BAUKAU, 16 Abríl 2026 (TATOLI) – Komandante Jerál Polísia Nasionál Timor-Leste, Komisáriu Asistente Afonso dos Santos, husu membru sira atu halo atuasaun iha terrenu ho disiplina iha munisípiu Baukau.
Komandante Afonso dos Santos, esplika, mandatu ne’ebé nia simu hamutuk ho segundu Komandante PNTL, Komisária Asistente Natercia Eufrasia Martins, foin fulan-ida nune’e hakarak membru hotu rona orientasaun husi komandante liuliu gaña konfiansa husi povu liuhusi evita atuasaun ho maneira agresivu hodi hamosu violénsia hasoru komunidade.
“Ha’u husu ba imi hotu mantein disiplina no orden komandu nian, la hamosu buat oinoin iha munisípiu ida-ne’e,” Komandante Jerál PNTL, Komisáriu Asistente Afonso do Santos hateten bainhira hala’o vizita dahuluk iha Komandu munisípiu Baukau, Kinta ne’e.
Eis komandante Unidade Espesiál ne’e simu informasaun husi komandante munisípiu Baukau relasiona ho kolaborasaun efetivu ne’ebé entre membru sira nune’e planeia atu reforsa tan seguransa iha munisípiu Baukau.
Alende ne’e, iha mandatu kompromete atu hadi’a instituisaun PNTL nune’e husu membru hotu rona orientasaun husi komandante munisípiu no la tolera membru utiliza fíziku no buka kolabora ho komunidade
“Ha’u husu atu kumpri orden ida-ne’e, seluk laiha. Bom sussesu ba PNTL munisípiu Baukau,” Afonso hameno.
Komandu PNTL durante mandatu Komisáriu Asistente Afonso do Santos no Segundu Komandante Komisária Asistente Natercia Martins iha programa inportánsia lima; Hasa’e profesiónalismu no disiplina, modernizasaun no teknolojia, polísia aprosimasaun komunidade, koordeansaun inter-institusionál no kooperasaun internasionál.
Entertantu, vizita dahuluk iha munisípiu Baukau, Komandante Jerál PNTL, Komisáriu Asistente Afonso do Santos no segundu Komandante Komisária Asistente Natercia hala’o sorumutu ho Bispu Dioseze Baukau, Dom Leandro Maria Alves, Prezidente Autoridade Munisipál (PAM) Baukau, Veneranda Lemos antes hala’o enkontru ho estrutura Komando PNTL munisípiu Baukau.
Jornalista: Natalino Belo
Editór: Evaristo Soares Martins
