OEKUSI, 05 Novembru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), kuarta ohin, hahú enkontru hodi prepara ba komemorasaun loron proklamasaun independénsia unilateralmente 28 Novembru ba dala-50.
Iha enkontru preparasaun ne’e, Prezidente Komisaun Organizadora, José Tanesib Anunu, informa ba kargu xefia sira, seguransa no autoridade komunitária katak, komemorasaun loron proklamasaun independénsia dala-50 iha tinan ne’e, komunidade sira sei konsentra iha suku ida-idak ho festeza hamutuk.
“Ohin hanesan enkontru konvokatóriu ba dahuluk hamutuk ho kargu xefia sira seguransa to’o autoridade komunitária sira. Ha’u hanoin enkontru ne’e mós tarde ona, maibé laiha buat ida, ita foin hahú atu prepara didi’ak hodi fó susesu ba selebrasaun ba dala-50 iha Oekusi, tanba tinan ne’e, ita sei selebra iha suku 20 nia sede idak-idak, lahanesan ona tinan hirak kotuk, ita selebra iha postu administrativua sira,” Prezidente Komisaun Organizadora, José Tanesib Anunu ba jornalista sira iha salaun Numbei, ohin.
Notísia relevante:KM aprova tema ba selebrasaun loron proklamasaun independénsia RDTL ba da-50
Atuál Diretór Diresaun Rejionál Administrasaun ne’e, informa, iha komemorasaun 28 Novembru 2025 ne’e, sei marka prezensa mós husi Primeiru-Ministru, Kay Rala Xanana Gusmão, nu’udar entidade tuteladu RAEOA no ZEEDOA nian.
Nia hateten, maske komunidade sira sei konsentra iha suku idak-idak, maibé husi autoridade komunitária sira, sei delega hela suku sira-nia reprezentante atu hamutuk ho Primeiru-Ministru, hodi komemora iha kampu futeból Oébau sub-rejiaun Pante Makasar.
Autoridade ne’e esplika, Governu implementa polítika ne’e tanba relasaun ho planu futuru implementasaun podér lokál no dezentralizasaun, tan ne’e presiza hahú daudaun ona, hodi hakbesik loron komemorasaun, loron istóriku sira ba komunidade sira iha suku no aldeia.
“Tanba agora ita foku ba preparasaun podér lokál, entaun komisaun sei koloka grupu isár bandeira ba suku sira atu ezekuta ordén ida-ne’e atu hamutuk ho komunidade sira bele asesu ho distánsia besik, ida-ne’e atu ema hotu nia sentidu nasionalizmu ne’e ema hotu bele sente, komemorasaun loron istóriku ne’e, depois kada suku sei delega nia reprezentante mai hamutuk ho Autoridade no Primeiru-Ministru,” nia hateten.
Ezekutivu ne’e informa, atividade prinsipál sira-ne’ebé sei implementa iha loron istóriku ne’e, ba suku sira mak desportu komunitária, kada suku mak sei define prioridade saida de’it mak atu hala’o.
“Tanba orsamentu ne’ebé Autoridade RAEOA liuhusi Gabinete Diresaun Rejionál Administrasaun prevee ona rihun $3, maibé posibilidade sei hetan aumentu husi Gabinete Prezidente Autoridade RAEOA hamutuk rihun $170 hodi sai ba rihun $200 atu finansia komemorasaun ne’e,” nia afirma.
Iha okazion ne’e, Xefe Costa Francisco Colo, orgullu tanba tinan ne’e Governu hakbesik komemorasaun loron istóriku ne’e ba komunidade sira.
“Primeiru ha’u agradese ba Governu tanba primeira-véz hakarak hakbesik loron bo’ot sira hanesan ne’e ba komunidade sira iha baze, ida-ne’e motivasau ida, oinsá nia preparasaun, hatene loron boot sira, tanba inan-aman barak iha área rurál, kada tinan sira labele partisipa tanba dook, maibé ho polítika ne’e, sira bele la’o ain ba sede suku, hodi kontente no sente ita-nia rezultadu ukun rasik an ne’e,” nia orgullu
Notísia relevante:Governu aloka millaun $1.600-resin ba komemorasaun Loron Proklamasaun Independénsia
Entretantu, antes ne’e, Governu liuhusi reuniaun Konsellu-Ministru aprova lema “Que a celebração destes 50 anos, do passado, nos assegure confiança no presente e esperança no futuro”, hodi komemora loron proklamasaun independénsia RDTL ba da-50 (28 Novembru 1975-28 Novembru 2025) neʼebé unilateralmente proklama iha 28 Novermbru 1975.
Proposta ne’e aprezenta husi Ministru Administrasaun Estatál, Tomas do Rosário Cabral, iha reuniaun Konsellu Ministru no deside hodi aprova lema referidu ne’ebé ho versaun lian tetun katak “Atu selebrasaun tinan-50, pasadu nian ne’e, fó mai ita konfiansa iha tempu prezente no esperansa ba tempu futuru”.
Jornalista: Abílio Elo Nini
Editór: Rafael Ximenes de A. Belo
