DILI, 04 Novembru 2025 (TATOLI)—Governu liuhosi Ministériu Administrasaun Estatál (MAE), aloka millaun $1.600-resin ba komemorasaun Loron Proklamasaun Independénsia Timor-Leste nian ba dala-50, iha 28 Novembru 2025.
Sekretáriu Jerál Komisaun Organizadora ba Komemorsaun 28 Novembru, Ângelo Urbano Fenandes, hateten hosi orsamentu ne’e sei prepara ba atividade espozisaun kulinária inklui ba korpu isár bandeira no mós imprime konvite no banner, prodús kamizola ne’ebé sei hakerek ho komemorasaun tinan 50.
“Ita mós apoiu osan ba munisípiu sira hodi selebra loron ne’e. Nune’e, iha munisípiu balun sei hetan $7.000 no ha balun $8.000 no balun fali $10.000. Ida-ne’e depende bazeia ba postu administrativu sira,” nia dehan ba TATOLI liuhosi telefónika, Kuarta ne’e.
Atuál Diretór Jerál Koorporativu MAE hateten parte hotu-hotu hahú ona halo preparasaun inklui ba korpu isár bandeira, ba membru korpu isár bandeira ne’e seidauk deside estudante hosi eskola ne’ebé maibé parte F-FDTL ho PNTL hahú halo preparasaun.
Iha parte seluk, Ministru Administrasaun Estatál, Tomás Cabral dehan serimónia ba 28 Novembru 2025 tinan 50 ne’e hasa’e bandeira iha Palásiu Governu.
“Espozisaun kulinária tradisionál sira, dansa folklórika, kompetisaun no timoroan sira hosi Austrália mós sei mai atu kompete ho konjuntu antigu sira iha Dili. Iha mós kompetisaun ba suku sira-ne’ebé mak prenxe kritériu administrasaun. Serimónia ne’e Prezidente Repúblika mak sei fó sertifikadu louvór ba xefe suku sira-ne’ebé halo servisu di’ak,” MAE dehan ba jornalista sira.
Cabral dehan espozisaun iha Tasi-Tolu ne’e sei hahú iha 24 Novembru. Maibé, horisehik (03/11) hahú ona ho jogu amizade futsál no sei ramata iha 24 Novembru 2025, iha kampu Bebora, Dili.
Jornalista: Osória Marques
Editór: Xisto Freitas da Piedade
