AILEU, 08 Novembru 2025 (TATOLI)-Primeiru-Ministru, Xanana Gusmão, no Ministru Obra Públika, Samuel Marçal, halo lansamentu ba projetu reabilitasaun estrada diresaun husi suku Seloi Kraik, Aileu, bá Tokoluli, Glenu, Ermera.
Iha lansamentu ne’e, Xefe Governu husu ba komunidade atu koopera no labele impede empreza nian serbisu, tanba iha fatin balu populasaun sunu tiha ekipamentu.
“Se ida-ne’e akontese maka di’akliu labele hadi’a estrada. Ne’e duni ami hotu ne’ebé hamriik iha ne’e fiar katak komunidade, liuliu joven sira atu hotu-hotu partisipa hodi aselera projetu ida-ne’e hodi ita halo fali buat seluk”, Xanana hato’o iha Seloi Kraik, ohin.
Hodi salienta katak bainhira implementa obra ida ho uitoan-uitoan maka sei impede mós dezenvolvimentu ba munisípiu sira seluk ne’ebé presiza.
Iha sorin seluk, Ministru Obra Públika, Samuel Marçal, hateten projetu ida-ne’e liuhusi konkursu internasionál, maibé empreza timoroan ida maka manán no foin ba dahuluk timoroan ida kompete ho empreza estranjeira.
“Ohin mai iha ne’e, ita la’ós hatuur de’it fatuk, maibé lori kontratu mai asina iha povu nia oin. Tanba ne’e gasta osan povu nian atu projetu ne’e sai na’in mak ita hotu-hotu”, ministru afirma.
Nia dehan povu mós iha direitu atu tau-matan no envolve iha prosesu dezenvolvimentu ne’e, signifika joven sira ne’ebé hakarak serbisu bele bá rejistu iha empreza hodi hetan oportunidade.
“Imi bele ajuda hada fatuk, hadi’a valeta ruma atu ajuda ekonomia família uma laran”, governante ne’e sujere.
Nia mós informa kona-ba aldeia balun ne’ebé seidauk asesu ba eletrisidade katak iha tinan 2026 fulan-Janeira bele hahú asina kontratu ba aldeia sira, nune’e husu ba komunidade hakmatek, tanba prosesu ne’e la’o hela.
Autoridade munisípiu Aileu, João Bosco dos Santos, agradese ba Governu ne’ebé foin ukun tinan rua, maibé ohin halo lansamentu ba estrada diresaun Seloi Kraik ba Tokoluli-Glenu. Hodi relata katak dezenvolvimentu ba estrada antes ne’e mós implementa tiha ona iha Lekidoe no lakle’ur tan kondisaum estrada sei di’ak ba ema hotu.
“Ne’e ita orgullu tebes, maski iha balun ko’alia ladi’ak maibé ida-ne’e mak kapasidade Governu nian hodi halo serbisu ho neneik, sei fó biban ba Aileu no Ermera hodi sirkula ninia ekonomia”, salienta.
Nune’e nia fiar katak empreza bele implementa projetu ida-ne’e tuir tempu ne’ebé define ona iha kontratu no husu ba komunidade husi parte rua ne’e atu koopera di’ak ho kompañia no Governu hodi aselera projetu ne’e la’o ho di’ak.
“Iha biban ne’e ami nafatin husu ba Governu atu reabilita estrada urbana iha Aileu laran”, nia hato’o.
Prezidente Autoridade munisípiu Ermera, José Martinho dos Santos Soares, hateten desizaun husi Governu ba reabilitasaun estrada fó benefísiu ba komunidade no halo konesaun entre munisípiu rua.
“Laiha liafuan barak, lori komunidade ne’ebé asesu ba estrada ne’e hakarak agradese ba Governu, liuhusi Primeiru-Ministru, Kay Rala Xanana Gusmão l, no membru tomak”, nia dehan.
Abitante iha suku Seloi Kraik, Alberto martins, hateten durante ne’e sira hein hela dezenvolvimentu, liuliu iha sira-nia suku Seloi Kraik ne’ebé la asesu bá estrada dezde Indonézia nian,
“Entaun, difikulta ba ami atu lori produtu bá fa’an iha merkadu, tanba Seloi Kraik poténsia ba agrikultura nian. Ho reabilitasaun estrada ne’e bele fo benefísiu mai ami”, nia realsa.
Nia promete prontu koopera ho Governu no empreza atu aselera projetu reabilitasaun estrada hodi fó biban ba komunidade halo movimentu.
Projetu ne’e implementa husi Marabia, Lda, ho durasaun tinan ida ho balun ho montante orsamentu $14.034.102, 63.
Jornalista: Alexandra da Costa
Editora: Maria Auxiliadora
