DILI, 12 Novembru 2025 (TATOLI)—Komandu Polísia Nasionál Timor-Leste (PNTL) submete ona kazu dirijente Servisu Nasionál Intelejénsia (SNI) na’in-rua hatama fugetes husi Atambua, Indonézia, ba Ministériu Públiku (MP).
“PNTL hasa’e ona kazu ne’e ba Ministériu Públiku, nune’e hein nafatin parte Ministériu Públiku, medida saida mak sira atu foti. Kazu ne’e aprezenta ba ona iha Segunda ne’e,” Komandante PNTL Munisípiu Likisá, Superintendente Polísia Calisto Gonzaga informa ba Jornalista sira iha Komandu Jerál PNTL, Kaikoli, Kinta ne’e.
Nia otimista prosesu ne’e la’o ho di’ak, “o que importante bainhira prosesu ne’e la’o, Polísia la taka buat ruma ba públiku, nia sala ne’e atu sala ou loos nia tenke responsabilidade iha lei nia oin.”
Calisto Gonzaga hatutan: “Sasán sira ne’e iha hotu ona Ministériu Públiku no sasán sira ita konsidera ne’e dekamiñu.”
Notísia relevante : PNTL-F-FDTL sei halo operasaun tama-sai bairru ba fogetes
Tuir Komandante, PNTL halo prosesu normál tanba fora husi fragante delitu, tanba prosesu ne’e mak tenke apár.
“La kualker kazu ida tenke ser flagrante, la kualker kazu ida prosesu normál tanba tenke haree nia sirkuntánsia. Ami hetan ona informasaun ne’e mak mai entrega fora ona, tanba ne’e mak ita prosesu normál,” nia katak.
Calisto Gonzaga dehan, kazu kontra bandu ne’e konsideradu ilísitu tanba la rejistu.
“Ita submete ona ba Ministériu Públiku para fó medida koasaun, kazu ida hanesan fó efeitu boot ba estabilidade, ne’e fugetes maibé ne’e sériu tanba bá ho veíkulu Patrimóniu Estadu,” nia tenik.
Sasán sira ne’ebé Komandu PNTL Munisípiu Likisá halo apreensaun kompostu husi fugete shoot ualu hamutuk 24 no fogete tipu seluk ho kuantidade hamutuk 90-resin.
“Sasán sira ne’e bazeia ba investigasaun partikulár sira hola iha Atambua. Tanba ne’e mak ita toma atensaun ona, la’ós atu nia funsionáriu Públiku, la’ós nia instituisaun Estadu nian ema ka kualker sé ita sei toma medida atuasaun, hanesan mós ba sira seluk,” nia hato’o.
Antes ne’e, iha Domingu (09/11) dirijente SNI na’in-rua ho inisiál OCG no AJdRX, hatama fugetes husi Atambua liuhusi Fronteira Terrestre Batugade utiliza karreta Marka Baic, ho xapa matríkula 05.424 G.
Ekipa konjunta husi FALINTIL-Forsa Defeza Timor-Leste (F-FDTL) no PNTL Likisá iha momentu ne’ebá halo kedan apreensaun ba sasán sira ne’e.
Nune’e, suspeitu na’in-rua submete ba investigasaun iha Departamentu Servisu Investigasaun Kriminál Komandu Munisípiu Likisá.
Kazu ne’e Komandu PNTL Munisípiu Likisá rejista ho NUK 0068/25.LIMBR, kontinua aprezenta bá MP.
Jornalista : Natalino Costa
Editora : Julia Chatarina
