DILI, 12 Novembru 2025 (TATOLI)–Governu liuhusi Ministru Defeza, Kontra Almirante Donaciano do Rosário da Costa Gomes klarifika, hafoin Governu Timor-Leste halo kontaktu intensiva ho Governu Filipina, deside atu suspende kontijente Forsa Tarefa Konjunta na’in-150 nia viajen bá Filipina tanba seidauk nesesáriu.
Kontijente sira ne’ebé tuir ajenda sei desloka faze dahuluk iha Sesta (14/11) preparadu atu halo misaun umanitária iha Filipina, hafoin kalamidade iha semana kotuk.
Ministru Defeza esplika, kontijente sira la konsege halo misaun umanitária iha Filipina tanba Governu Filipina rasik admite katak iha rekursu naton atu fó asisténsia hafoin dezastre naturál.
Notísia relevante : Governu despede kontijente na’in-150 fó asisténsia umanitária iha Filipina
Prezidente Repúblika Filipina, Bongbong Marcos, iha Kuarta (12/11) rasik halo ona kontaktu ho Primeiru-Ministru, Xanana Gusmão hodi hateten apresia ba Timor-Leste nia preparasaun maibé dalaruma la’ós agora.
“Ha’u hakarak adianta informasaun kona-ba ita-nia kontijente ne’ebé mak preparadu haruka bá Filipina, ita-nia Señor Primeiru-Ministru simu telefone ida husi Prezidente Filipina, agradese ba ita-nia disponibilidade, ba ita-nia intensaun hotu, ba ita-nia preprasaun hotu, maibé Governu Filipina hateten katak dalaruma la’ós agora mak ita haruka ita-nia forsa tanba sobre forsa detraballu ne’ebé mak sira iha bele hela korresponde ba situasaun ne’ebé mak akontese, dezastre naturál ne’ebé akontese iha sira-nia rain,” Ministru Defeza hateten ba Jornalista iha Parlamentu Nasionál, Kinta ne’e.
Klamar Fuik hateten, kontijente sira prepara-an halo misaun umanitária iha Filipina nu’udar ezersísiu ida, liuliu apontamentu forsa atubele destaka ba kualker misaun umanitária.
Enkuantu, Governu Filipina nia intensaun ne’e la’ós kanselamentu, maibé hanesan suspesaun ba kontijente Forsa Tarefa Konjunta Timor-Leste nian depende ba situsaun dezastre naturál iha Filipina.
“Sim, suspensu tanba iha Governu Filipina rasik, Governu sentrál mak reuni nia dehan para já seidauk presiza. Apesar de Governu rejionál ou Governu provensiál (Filipina) iha konkordásia ho ita-nia Ministeriu Negósiu Estrajeiriu atubele destaka ita-nia forsa ba. Entretantu Governu sentrál dehan para já seidauk presiza,” nia katak.
Governante ne’e hatutan: “Suspende, bele suspende para depois haree revolusaun situasaun, bainhira katak sira presiza ita prontu ona.
Antes ne’e, kontijente sira ne’ebé preparadu atu arranka bá Filipina kompostu husi membru FALINTIL-Forsa Defeza Timor-Leste (F-FDTL) 120, pesoál husi Autoridade Protesaun Sivil Diresaun Bombeiru na’in-20, Servisu Saúde na’in-neen no Institutu Jestaun Ekipamentu Dezenvolvimentu Infrastrutura, Institutu Públiku (IGEADI, I.P) reprezenta husi ema na’in-haat.
Jornalista : Natalino Costa
Editora : Julia Chatarina
