DILI, 14 Novembru 2025 (TATOLI)—Ekipa Buibere Football Club lakohi haksolok ho rezultadu jogu ne’ebé provizoriamente lori nia lidera tabela klasifikasaun dahuluk primeira divizaun Liga Futeból Femeninu Timor-Leste (LFFTL).
Treinadór Buibere FC, Octavianus Pinto esplika primeira divizaun nu’udár liga ne’ebé kompetisaun sei naruk no iha adversáriu ne’ebé kompetetivu tanba inportante mak kada jogu tenke gaña pontu no rekolla golu nune’e bele garante mantein pozisaun iha tabela klasifikasaun to’o kompetisaun ramata.
Notísia relevante: Buibere FC dere Kulugisa 18-0
“Bele kontente ho rezultadu jogu maibé tenke kontinua esforsu nune’e jogu seluk tuirmai nafatin gaña pontu,” Treinadór Buibere FC hateten iha Estádiu Munisipál Dili, Sesta ne’e.
Nia relata kada semana Buibere FC nafatin halo preparasaun liuliu evalua fallansu iha jogu ne’ebé hala’o ona no kontinua treinu nune’e jogadora sira bele koletiva inklui mantein kualidade jogu.
Entretantu, Buibere FC provizoriamente lidera hikas tabela klasifikasaun ho pontu 12, rezultadu manán haat (4) ho produtividade golu +38, hafoin manán Kulugisa FC ho skor 18-0 iha jornada dahaat ne’ebé hala’o iha Estádiu Munisipál Dili, Kinta (13/11/2025).
Jornalista: Natalino Belo
Editór: Xisto Freitas da Piedade
