DILI, 14 Novembru 2025 (TATOLI)—Koordenadór Gabinete Kurríkulu Unidade Nasionál iha Ministériu Edukasaun (ME), João Maupelu informa, tinan oin, ME hahú implementa kurríkulu terseiru siklu ba sétimu (7o) anu iha eskola ensinu báziku terseiru siklu iha territóriu.
“Tinan oin (2026), ita implementa kurríkulu terseiru siklu ba sétimu anu depoiz tinan tuirmai tan ba oitavu anu no iha tinan 2028 implementasaun kurríkulu terseiru (3o) siklu kompletu ona,” nia dehan ba jornalista sira iha nia knaar fatin, Vila Verde, Dili, Sesta ne’e.
Koordenadór Gabinete Unidade Kurríkulu ne’e dehan parte ME halo ona diskusaun ho autoridade edukasaun munisípial hodi sensibiliza kurríkulu ensinu báziku 7º ano nian.
“Diskusaun ho autoridade edukasaun munisipál no superintendente sira atu sensibiliza kurríkulu 3º siklu, ho objetivu atu orienta edukasaun iha munisípiu,” nia haktuir.
Dixiplina ne’ebé mak atu implementa iha ensinu báziku terseiru siklu mak hanesan iha área dezenvolvimentu linguístika mak lian tétun, portugés no inglés. Iha área dezenvolvimentu sientífiku mak matemátika, siénsia fízika no naturál, istória no jeografia. Iha área dezenvolvimentu sosiál ka pesoál mak edukasaun fízika, edukasaun artístika, edukasaun sívika, sidadania no direitu umanu, edukasaun relijiaun no morál inklui kompeténsia ba moris no traballu.
Jornalista: Osória Marques
Editór: Xisto Freitas da Piedade
