DILI, 17 Novembru 2025 (TATOLI)-Deputadu husi Partidu Kongresu Nasionál Rekonstrusaun Timorense (CNRT, sigla portugés), Virgínia Ana Belo, sujere ba Ministériu Finansa (MF) atu kria sistema pagamentu eletróniku ba estabelesimentu komersiál sira.
Nia observa katak loja boot sira barak ne’ebé fa’an sasán uma-laran no kontrusaun to’o agora utiliza pagamentu ho osan cash no konta de’it ho kalkuladora.
“Se ita bá foti osan iha mákina, Banku Sentrál sempre ko’a ho kuantia ida ba Estadu hanesan taxa. Maibé, se ita ho pagamentu direta ho cash loja sira ne’e, ita nein hetan buat ida. Tenke ezije ona ba loja boot sira tau ona pagamentu ho eletróniku para husi ne’ebá ita hetan netik taxa ruma hanesan Estadu nia reseita”, nia hato’o iha debate proposta Orsamentu Jerál Estadu (OJE) 2026 iha faze espesialidade, iha Parlamentu Nasionál, ohin.
Ministra Finansa, Santina Cardoso, responde katak Governu ho Banku Sentrál Timor-Leste (BCTL, sigla portugés) kontinua atu halo melloramentu ba sistema, nune’e pagamentu sira sei utiliza kartaun eletróniku.
Governante ne’e dehan kona-ba kestaun ne’e loja sira daudaun ministériu dezenvolve hela sistema. “Inklui loja xieneza sira, ami hein hela sistema foun, saida mak ita halo mak loloos bele hatene sira-nia rendimentu, nune’e auditória Ministériu Finansa halo bele foti dadus importasaun sasán ne’ebé tama no nia deklarasaun rendimentu”, nia hateten.
Jornalista: Nelson de Sousa
Editora: Maria Auxiliadora
