DILI, 19 Novembru 2025 (TATOLI)—Parlamentu Nasionál aprova Orsamentu Jerál Estadu (OJE) 2026 ba Ministériu Solidariedade Sosiál no Inkluzaun (MSSI) hamutuk $24.741.600 iha espesialidade ho votu a-favór 42, kontra 0 no abstensaun 23.
Husi orsamentu ne’e aloka ba saláriu no vensimentu $4.303.740, bens no serbisu $8.058.713, transferénsia públika $11.751.672 no kapitál dezenvolvimentu $627.475.
Tuir livru OJE 2026 nian, orsamentu ne’e sei aloka ba programa funsionamentu dezenvolvimentu institusionál ho montante $9.797.358 no programa inkluzaun sosiál hamutuk $14.944.242 no sub-programa hamutuk 15.
Iha diskusaun ne’e, Deputada Cristina Yuri Ribeiro, preokupa ho atendementu husi Ministériu Solidariesdade Sosiál no Inkluzaun (MSSI) nian ba atendementu traballa infánsia ne’ebé nafatin faan sasán iha dalan ninin.
“Ha’u lahatene implementasaun servisu ne’e iha mudansa ka lae, tanba ohin ha’u liuhusi dalan protokolu Komoro hetan labarik sira nafatin faan sasán iha espasu públiku liuliu iha oras eskola nian. Asaun ida-ne’e nafatin akontese, oinsá ho ministériu ninia estratéjia atu minimiza traballa infantile,” Deputada ne’e hateten ba Governu, iha PN, ohin.
Ministra Solidariedade Sosiál no Inkluzaun, Verónica das Dores, hateten servisu ida-ne’e la paradu tanba Governu nafatin iha esforsu atu minimiza traballa infantil iha espasu públiku, maibé tenke iha kooperasaun mós ho família liuliu inan-aman sira.
“Tanba, durante ne’e, Governu la’ós servisu mesak. Ami sempre servisu hamutuk ho INDDICA hodi halo levantamentu dadus. Iha balun mak rezolvidu ona hanesan apoia ba edukasaun no ekonómia família, maibé depende ba orientasaun inan-aman nian. Dalabarak ami husu razaun sira faan ne’e, sira dehan nesesidade mak obriga no iha balun labarik sira mak hakarak rasik,” nia dehan.
Signifika, nia dehan, inan-aman sira mós tenke servisu hamutuk ho Governu atu bandu ona oan sira atu kontinua faan iha espasu públiku, maibé dalaruma ekonómia la sufisiente entaun labarik sira kontinua faan iha dalan ninin.
Jornalista : Alexandra da Costa
Editór : Cancio Ximenes
