BOBONARU, 19 Novembru 2025 (TATOLI)-Autoridade Munisípiu Bobonaru (AMB) ameasa atu hakotu kontratu serbisu ho empreza Bia Basan Mogen Unipessoal Lda. ne’ebé implementa projetu konstrusaun ba irrigasaun Genumatan, iha suku Ritabou, postu administrativu Maliana.
Razaun hapara kontratu ho emprea tanba serbisu fiziku iha terrenu la’o atraza no besik ona fulan-Dezembru mós obra ne’e hatudu progresu di’ak.
Sekretariu Autoridade Munisípiu Bobonaru ba Asuntu Planeamentu no Dezenvolvimentu Integradu, Semedo Laco, admite katak fulan kotuk Prezidente Autoridade Bobonaru fó ona notifikasaun ba empreza atu iha prazu to’o loron 20 fulan ne’e mobiliza materiál bá terrenu hodi finaliza obra.
Nia haklaken katak bainhira empreza la kumpre notifikasaun ne’e maka sei foti medida rigoroza, tanba laiha responsabilidade ba konfiansa ne’ebé autoridade munisípiu Bobonaru fó, ne’ebé liuhusi prosesu lubuk.
Notísia relevante: Xefe suku Ritabou husu kompañia aselera konstrusaun irrigasaun Genumatan
“Servisu dudu la bá. Ohin dehan atu lori materiál bá fakar. Aban fali la lori bá, semana ida fali mak foin lori tan. Oinsá mak progresu ne’e atu la’o? Kompañia ne’e iha avaliasaun prienxe rekizitu, maibé to’o ikus fiar ne’ebé ita fó la konsidera. Ne’e mak ita tenta beibeik kuandu to’o tempu nia labele, ita hakotu kontratu ho kompañia”, nia subliña iha reuniaun Konsellu Koordenasaun Munisipál ne’ebé realiza iha salaun Maria Tapó, kuarta-feira ne’e.
Diretór Servisu Munisipál ba Planeamentu no Dezenvolvimentu Integradu, Autoridade Munisípiu Bobonaru, Rui Bere Mau, haktuir razaun husi empreza katak momentu implementa ne’e tempu natar-na’in sira ko’a hela hare, nune’e difikulta mobilizasaun materiál ba lokál projetu.
Bere Mau konfirma katak progresu fíziku atuál atinje ona 57% no empreza mós hetan ona pagamentu 50%, maibé ekipa téknika sira halo observasaun iha terrenu no identifika katak serbisu la’o-para no dalaruma traballadór laiha lokál projetu.
“Agora cor tan metru 72 husi intek ne’e hotu ona. Besi homan hotu ona, dasar mós sira fui ona, maibé enjeñeiru sira bá traballadór laiha, ne’e problema. Más fulan kotuk ita fó ona karta notifikasaun katak to’o 20 Novembru mak la lori materiál bá terrenu Prezidente Autoridade Bobonaru sei halo karta hakotu kontratu, bolu filafali kompañia seluk atu mai kontinua”, nia salienta.
Diretór Servisu Munisipál Agrikultura, Longuinhos João, komenta katak parte grikultura ne’ebé hanesan na’in ba obra ne’e mós to’o agora lahatene progresu serbisu no dezafiu sira tanba empreza la halo koordenasaun di’ak.
Antigu Diretór Eskola Agríkola Moleana ne’e preokupa no husu atu buka meiu tanba agora besik tama ona ba tempu atu halai natar.
“Primeira époka 2025-2026 labele halo natar, tanba irrigasaun seidauk hotu. Ida-ne’e problema boot”, nia lamenta.
Xefe suku Raifun, Domingos Salvador, ne’ebé reprezenta Membru Konsellu Koordenasaun Munisipál, postu administrativu Maliana preokupa ho problema ne’e tanba afeta ba natar-na’in sira labele halo natar iha epoka dahuluk.
“Ne’e problema, tanba ita hakarak ita-nia agrikultór sira asesu ba bee husi irrigasaun ne’e”, dehan.
Notísia relevante: Projetu irrigasaun Genumatan seidauk hatudu progresu
Governu lokál konstrui irrigasaun ne’e atu fornese bee ba to’os no natar hamutuk ektare 80 hodi tulun agrikultór sira hasa’e produsaun agríkola, nune’e bele responde ba nesesidade doméstika munisípiu Bobonaru nian.
Obra ne’e konstrui ho orsamentu PDIM tinan 2025 ho montante 229.429,35 ne’ebé hahú iha 23 Abríl 2025 no tuir kontratu ne’ebé deskreve iha kuadru projetu, obra ne’e finaliza iha Setembru.
Jornalista: Sérgio da Cruz
Editora: Maria Auxiliadora
