OEKUSI, 24 Novembru 2025 (TATOLI) – Ministériu Turimzu no Ambiente (MTA) liuhusi Diresaun Jerál Ambiente, segunda ohin, halo lansamentu ba programa tolu, mak hanesan, suku verde, eskola verde no brigada ambientál iha Rejiaun Administrativa Espesiál Oekusi Ambeno (RAEOA) ho tema ‘Haforsa Papél Komunidade, Estudante no Juventude sira kona-ba Protesaun no Konservasaun Ambientál Lokál ba Dezenvolvimentu Sustentavél’.
“Atividade tolu iha planeia ona atu implementa iha Oekusi, tanba iha rai bo’ot finaliza ona, entaun atu hahú atividade ne’e, ita tenke liuhusi lansamentu ofisiál ida, signifika hahú ohin ba oin, tinan ba tinan, ita halo ba eskola ida ba eskola seluk, husi suku ida ba suku seluk no mós ba juventude sira, oinsá proteze no konserva ita-nia ambiente sira,” Diretór Diresaun Jerál Ambiente, Domingos Mesquita iha salaun Pante Makasar Oekusi informa, ohin.
Notísia relevante:Parlamentu aprova millaun $9.547 ba Ministériu Turizmu no Ambiente
Dirijente ne’e esplika, ba eskola verde, ekipa MTA sei halo formasaun ba estudante sira inklui manorin sira, ho matéria siénsia ambiente nian, atu introdús ba eskola sira hotu, kona-ba problema ambiente, problema mudansa klímatika liu-liu iha Oekusi.
Depoizde formasaun, ekipa husi ministériu sei observa hodi fó apoi eskola sira liuhusi fundu subvensaun públika, atu fornese materiál no fasilidade liga asuntu saneamentu ijiéne ba asuntu bee-moos nian, nune’e bele hamosu kompetisaun eskola verde, tanba atividade ne’e hanesan mós suku verde, ho intensaun atu integra serbisu ambiente turizmu iha suku no aldeia sira, tanba suku mak reprezenta Estadu no Governu ki’ikliu iha povu nia leet.
“Atu haree ita-nia ambiente di’ak, ita tenke hahú husi kraik liu, mak sa’e ba leten. Entaun saida mak ita halo, ita envolve direita komunidade, lia-na’in sira, estruturura suku sira, atu fasilita formasaun esplika ba sira, atu identifika kazu prinsipál kada suku nia problema ne’e saida, nune’e ita bele hadi’a ba futuru, depois bele apoia mós fundu itoan atu fasilita sira-nia atividade para kontinua la’o,” nia hateten.
Tuir ezekutivu ne’e, kona-ba asuntu brigada ambiente ne’e, parte MTA sei halo rekrutamentu ba juventude sira-ne’ebé ho voluntariamente, hakarak serbisu hamutuk ho Ministériu Turizmu, Ambiente, atu haree kestaun ambiente iha suku idak-idak ne’ebé sira hela ba.
“Ami apoia siénsia de’it, kapasita sira, kuandu hatene ona, ami dezloka sira ba terrenu maibé serbisu voluntária de’it, ami akompaña de’it sira-nia atividade iha kada suku, tanba sira hanesan liman ain Estadu no Governu nian, atu tau matan ba problema ambiente sosiál iha suku sira, tanba atividade tolu Governu nia programa atu lori hakbesik ba to’o suku sira iha territóriu tomak,” nia hateten.
Notísia relevante:Servisu Meiu Ambiente Oé-Cusse sensibiliza jestaun ambientál ba estudante ETARO
Xefe Departamentu Rekursu Umanu no Finansa iha Diresaun Rejionál Edukasaun no Solidariedade Sosiál, Cebastião Icu, reprezenta Autoridade RAEOA agradese ba polítika ne’e, no rekomenda bainhira hahú hala’o formasaun, presiza involve serbisu edukasaun Oekusi hodi armoniza liña koordenasaun.
“Tópiku tolu ne’e importante tanba liga direita mós ho programa edukasaun Oekusi nian, ne’ebé durante ne’e aplika ona ba eskola sira oinsá hamatak eskola, tan ne’e ha’u rekomenda karik hala’o formasaun ruma ba eskola sira, presiza involve mós profesór sira no serbisu edukasaun, nune’e programa ne’e la’o di’ak liután, tanba ita hotu nia hakarak, eskola sira tenke furak, tenke matak, ne’ebé ami agradese tebes, tanba ho programa ne’e, ita bele hamutuk tau matan ba eskola sira hotu iha Oekusi,” nia orgullu.
Notísia relevante:MTA introdús konseitu ekonomia azul ba universitáriu iha Oekusi
Entretantu, tuir ajenda ekipa husi Ministériu Turizmu no Ambiente, sei hala’o uluk formasaun no sensibilizasaun ba estudante eskola tékniku vokasionál sira iha loron tersa-feira aban 25 Novembru 2025 iha Eskola Tékniku Agríkola Oekusi (ETARO), tuirmai sei kontinua ba suku sira.
Jornalista: Abílio Elo Nini
Editór: Rafael Ximenes de A. Belo
