DILI, 08 Dezembru 2025 (TATOLI)—Ekipa futeból ADR Uniaun halakon Kovalima FC ho pontu 2-1, iha abertura jogu apuramentu ba Liga Futeból Timor-Leste (LFTL) segunda divizaun époka 2026.
Jogu ne’ebé hala’o iha kampu futeból Dom Bosco, Segunda ne’e, la’o ho atrativu no dramátiku, iha primeira parte iha minutu rua, Kovalima FC liuhusi jogadór Arcénio ho númeru kamizola 13, suta husi dook bola, nune’e ADR União nia guarda rede la konsege salva bola no tama bá baliza laran, nune’e muda pontu iha momentu ne’e kedan.
Ho golu ne’e, ADR União la lakon esperansa hodi troka tátika jogu nian hodi halo subtituisaun ba jogadór na’in-haat hodi reforsa jogu defeza no médiu.
Nune’e, iha jogu, ekipa ADR União hasa’e liután tempu jogu nian hodi halo kontra ataka ba ekipa Kovalima.
Ekipa Kovalima FC la nonok hodi lansa kontra ataka hodi fó ameasa ba guarda rede ADR União, maibé laiha golu mak prodús tan to’o jogu parte dahuluk ramata.
Tama ba jogu parte daruak nian, ekipa Kovalima FC hasa’e ritmu jogu hodi lansa kontra ataka ba baliza ADR União nian liuhusi maneira atu aumenta tan golu.
Ho apoiu husi apoiante Kovalima FC nian, ekipa jogadór ho espíritu ofensiva kontinua halo kontra ataka ba iha rede adversáriu.
Maibé, iha minutu 57 liuhusi jogadór ADR União Nicolau da Cruz númeru kamizola 8, suta livre bola iha grande área, ne’ebé tuir loloos guarda rede kaer Kovalima FC maibé nia husik liu ba loos jogadór ADR União Chiquito ho kapsada ho uluk no konsege fura guarda rede Kovalima FC, ho golu ne’e parte rua impata ho 1-1.
Ho nune’e, jogu hahú manas liután tanba ekipa rua halo presaun ba malu no to’o minutu 89, jogadór ADR União, Nicolau da Cruz númeru kamizola 8, hafoin simu bola kruza husi nia maluk jogadór Miguel númeru 16, Nicolau fura guarda rede Kovalima FC, ho golu ne’e muda ADR União nia pontu sai 2 no Kovalima FC mantein ho golu 1.
Notísia relevante : Liga Futeból Feto Divizaun Dahuluk abertura iha 27 Setembru
Nune’e, iha jogu apuramentu LFTL ba segunda divizaun époka 2026, ADR União konsege rekolla pontu tolu iha tabela klarifiksaun.
Hafoin abertura jogu ne’e, Prezidente LFTL Ipolito Soares hateten, iha jogu apuramentu ne’e, klubu sira sei kompete hodi rezulta klubu lima ne’ebé iha direitu ba billete.
“Abertura ohin atu fó oportunidade ba klubu sira hodi kompete, nune’e ita bele rezulta klubu lima ne’ebé iha direitu ba billete, atu kompleta klubu lima seluk ne’ebé atuál iha ona segunda divizaun. nune’e bele iha klubu 10 mak kompete,” Ipolito hato’o ba jornalista sira, iha kampu futeból Dom Dosco, Komoro.
Nia haktuir, kompetisaun referidu iha klubu 38 maka kompete, nune’e bele hadau billete hodi prense fatin lima iha segunda divizaun iha époka oin mai.
Orsamentu ne’ebé uza ba jogu referidu mai husi kada klube ne’ebé utiliza hodi halo rejistrasaun.
“Orasametu ne’e úniku de’it husi rejistrasaun klubu sira, kada klubu rejistra ho montante $1.000, ida-ne’e maka ita utiliza ba operasionál jogu hotu-hotu,” nia esplika.
Prezidente LFTL relata, jogu apuramentu segunda divizaun ne’e fahe ba grupu neen no kada klubu hala’o kompleta dala haat.
“Tanba ne’e, tuir oráriu ne’ebé ha’u-nia tékniku sira iha, jogu apuramentu segunda divizaun sei termina iha Fevereiru 2026,” Ipolito akresenta.
Aleinde ne’e, Ipolito Soares husu jogadór sira, atu hatudu Fair Play iha jogu, atubele dudu futeból ba oin.
“Ha’u husu ba jogadór ekipa rua atu hatudu Fair Play iha jogu, karik iha problema ruma ko’alia di’ak ho árbitru sira hodi hatudu respeitu hanesan jogadór, nune’e bele dudu ita-nia futeból ba oin, tanba ohin loron hanesan abertura ba ita-nia jogu apuramentu segunda divizaun nian,” nia katak.
Klubu 38 ne’ebe kompete iha faze apuramentu segunda divizaun mak hanesan Relay Laleia Fc, São José Fc, Fc baltatres, fc vila atauro, Naimeco Fc, ADR União, B2B Fc, Fimas Baukau, Covalima fc, Fatunash fc, As Mamura, As Kantada, Assa Fc, Fc Nature, Unidos Fc, fc Lero, Ad Santo António, Rai klaran fc, maudoko fc, Dark Blue fc.
Nune’e mós, Karau Fuik Fc, Ostico fc, Ad Bas,akademia hera, salarima fc, Laisorulai fc matebian, Sousa United, Kef Ablai, Fc Aimo, Weasel fc, Atletico mota ain, Irapuha Fc, Hibers dili fc, no Mota bandeira fc.
Jornalista : Natalino Costa
Editora : Julia Chatarina
