DILI, 15 Dezembru 2025 (TATOLI)-Prezidente Tribunál Rekursu, Afonso Carmona, informa katak pedidu fiskalizasaun abstrata konstitusionalidade ba revogasaun Lei Pensaun Vitalísia nia prosesu iha hela tribunál.
“Prosesu ne’e ninia distribuisaun ba juis, entaun juis titulár halo nia prosesu, tanba tenke halo notifikasaun ba parte kontrante hodi fó resposta no la termina bainhira”, nia hateten ba jornalista sira iha Palásiu Prezidensiál Aitarak-Laran, ohin.
Tanba ne’e, importante andamentu la’o no hein juis titulár termina nia prosesu no ikus mai envolve koletivu juis hodi halo deliberasaun.
Relasiona ho Estudante Universitáriu Timor-Leste (EUTL) ne’ebé sei halo marsa, Afonso Carmona dehan ne’e iha direitu atu halo marsa ka manifestasaun ruma no la bandu tanba Timor-Leste nasaun demokrátiku, maibé labele liberdade liu tanba iha limitasaun.
“Kontrolu sosiál ne’e importante, ita respeita, maibé la influensia desizaun tribunál nian”, afirma.
Rekorde katak Portavós EUTL, Natalino Nunes Martins, husu ba Tribunál Rekursu atu deklara konstitusionalidade ba Lei Pensaun Mensál Vitalísia ba públiku.
“EUTL husu Tribunál Rekursu deklara konstitusionalidade ba lei númeru 7/2025, 29 Setembru, ne’ebé halakon Lei Pensaun Mensál Vitalísia ne’e”, portavóz Natalino dehan foin lalais ne’e ba jornalista sira iha Universidade Nasionál Timor Lorosa’e, iha Kaikoli, Dili.
Lembra katak benefisiáriu balun ne’ebé durante ne’e simu pensaun vitalísia hatama pedidu fiskalizasaun abstrata susesiva hodi haree kestaun kona-ba konstitusionalidade ba revogasaun Lei Pensaun Vitalísia, tanba benefisiáriu sira lamenta ho revogasaun ne’e no konsidera inkonstitusionál.
Notísia relevante: https://tatoli.tl/2025/11/07/eutl-husu-tribunal-rekursu-deklara-konstitusionalidade-lei-pensaun-mensal-vitalisia/
Jornalista: Nelson de Sousa
Editora: Maria Auxiliadora
