BOBONARU, 16 Dezembru 2025 (TATOLI) – Supervizór Eletrisidade Timor-Leste (EDTL) munisípiu Bobonaru, Mário de Jesus, afirma katak ekipa téknika sei tun bá terrenu hodi foti asaun firme hasoru utilizadór eletrisidade ilegál iha postu administrativu Bobonaru, liuliu kliente sira iha área Lalebol, aldeia Tuluata, suku Bobonaru Vila no aldeia Aisalgusun, suku Ai-asa, no Lour, tanba to’o agora maioria seidauk selu multa ba Estadu.
Antes ne’e, ekipa téknika hakotu ona eletrisidade durante semana ida liu iha aldeia no suku hirak ne’e, maibé foin lalais EDTL deside halakan fali no fó tan tempu atu koopera hodi selu koima.
Bainhira la kumpre maka empreza estatál sei foti medida zero toleránsia ba kualkér kliente, tanba konsidera aktu hirak ne’e sei estraga sistema distribuisaun enerjia, inklui ekipamentu (kontadór), liuliu fó prejuízu ba Estadu.
Notísia relevante: EDTL ameasa hakotu liña eletrisidade ba uma-kain 400 resin
“Agora sira ida-rua mak foin mai selu. Ne’e duni iha loron boot nia laran ha’u sei tolera sira. Ahi agora lakan hela, maibé liu tiha natál kuandu sira la koopera ho EDTL selu multa, ami sei hamate ahi jerál de’it. Tanba ami hetan uma-kain barak tebetebes mak dada ahi ilegál”, nia informa ba Tatoli, ohin.
Xefe Suku Bobonaru Vila, Jacinto Viegas, relata katak líder komunitaria fó hatene ona ba komunidade atu koopera ho ekipa EDTL. “Problema illegal, komunidade tenke bá selu multa lai”, nia realsa.
Tuir dekretu-lei nú. 33/2016, 17 Agostu, kona-ba regulamentu ba Lisensa Enérjia Elétrika ho niaTarifa sira, iha artigu 13 husi dekretu-lei ne’e mensiona; a. Kliente ne’ebé ligasaun direta ilegál ba rede públika eletrisidade ho la utiliza kontadór elétriku sei multa $100 to’o $2000 ba konsumidór sira doméstiku, no $2000 to’o $15.000 ba konsumidór kategoria seluk.
b. Halo ligasaun ilegál ba rede eletrisidade liuhusi intervensaun eletrisista ne’ebé la autoriza husi EDTL, E.P sei multa administrativa ho montante husi $500 to’o $2.000.
c. Kliente ne’ebé troka ka modifika ekipamentu elétrika ne’ebé EDTL, E.P monta, sei multa administrativu $100 to’o $2000 ba konsumidór sira doméstiku, no $2000 to’o $15.000 ba konsumidór kategoria seluk.
Notísia relevante: EDTL Bobonaru dezliga ligasaun ilegál ualu iha Tapo-Memo
Jornalista: Sergio da Cruz
Editora: Maria Auxiliadora
