DILI, 16 Dezembru 2025 (TATOLI)-Parlamentu Nasionál liuhusi eleisaun, ohin, hili ona Carmelita Caetano Moniz no José Pedro Mariano Neves Camões nu’udar membru efetivu ba komisaun rekrutamentu ba instalasaun Supremu Tribunál Justisa (STJ).
Liuhusi eleisaun sekretu deputadu sira vota a favór 36, kontra 18 no abstensaun tolu.
Prezidente Parlamentu Nasionál, Maria Fernanda Lay, hateten meza simu lista únika ne’ebé aprezenta kandidatu husi bankada Partidu Kongresu Nasionál Rekonstrusaun Timor-Leste (CNRT, sigla portugés) no Partidu Demokrátiku (PD) ba membru efetivu rua ne’e no suplente rua mak Chiquito Monteiro no Leonito Ribeiro.
Vise-Prezidente Parlamentu Nasionál, Alexandrino Nunes, lee sai karta aseitasaun ba nomeasaun husi kandidatu sira ba komisaun instaladora STJ hodi halo konkursu ba entidade internasionál ne’eb sei halo teste ba juis, prokuradór no jurista rekoñesidu méritu husi Parlamentu Nasionál.
Tanba tuir karreira profisionál, koñesimentu no abilidade, esperiénsia serbisu iha justisa tinan naruk, no kandidatu sira kompromete halo knaar profisionál nu’udar membru komisaun hodi halo tuir de’it mandatu konstitusionál no lei sira ne’ebé vigora.
Deputadu husi Partidu Frente Revolusionária Timor-Leste Independente (FRETILIN), Joaquim dos Santos, kestiona aprezentasaun kandidatura laiha proporsionalidade tanba parte opozisaun laiha kandidatu no iha de’it husi bankada Governu.
Prezidente Parlamentu Nasionál, Maria Fernanda Lay, responde katak prosesu ne’e lori tempu naruk, maibé bankada opozisaun mak la aprezenta ninia kandidatura.
Xefe bankada CNRT, Patrocínio dos Reis Fernandes, nafatin konsidera prinsípiu proporsionalidade, maibé problema bankada opozisaun mak laiha kandidatura.
Tuir prosedimentu, membru na’in-rua dezigna husi Parlamentu Nasionál hodi kompoin iha komisaun rekrutamentu no selesaun prevista iha Lei Organizasaun Judisiária.
Tuir artigu 83, komisaun rekrutamentu iha númeru 2 hateten, kompostu husi sidadaun na’in-tolu nasionál ne’ebé ida indika husi Prezidente Repúblika no rua husi Parlamentu Nasionál, husi bankada parlamentár eleitu husi eskrutíniu sekretu husi deputadu iha Parlamentu.
Notísia relevante: Parlamentu sei harii komisaun rekrutamentu ba instalasaun Supremu Tribunál Justisa
Jornalista: Nelson de Sousa
Editora: Maria Auxiliadora
