DILI, 17 Dezembru 2025 (TATOLI)–Ministra Edukasaun (ME), Dulce de Jesus Soares hateten Ministériu Edukasaun (ME) la aloka orsamentu ba programa subsídiu estudante ne’ebé ho valór boot iha ezame nasionál tinan ne’e, más FDCH bele apoiu.
“Governu la aloka osan ba bolsu estudu iha ME maibé Fundu Dezenvolvimentu Kapitál Umanu (FDCH-sigla portugeza) eziste hodi apoiu. Se estudante ne’e matenek no iha valór di’ak, ha’u fiar sei hetan oportunidade. Ne’e duni, dala ida tan iha bolsu estudu ne’ebé mak Governu trasa tiha ona mak iha FDCH,” Ministra Dulce dehan ba jornalista sira iha Ministériu Edukasaun, Vila-Verde, Kuarta ne’e.
Dulce subliña asuntu ida-ne’e Ministériu Edukasaun tau planu no haree fali iha futuru.
Iha fatin hanesan, Diretór Servisu Edukasaun Munisipiu Dili, Sabino Pereira dehan iha munisípiu la prevee orsamentu ba asuntu ida-ne’e, maibé servisu hamutuk ho Governu Índia hodi oferese bolsa estudante ne’e.
“Ita halo ona zoom meeting iha Novembru. Ita konvida diretór eskola sira inklui estudante partisipa tanba Governu Índia hakarak oferese bolsu estudu ba estudante ho sira-nia kustu ne’ebé maka baratu liu. Ida-ne’e fó ona informasaun ba diretór eskola sira, atubele hatutan informasaun ne’e ba estudante finalista sira,” nia tenik.
Entretantu, Diretór Ezekutivu Fundu Dezenvolvimentu Kapitál Umanu, Júlio Aparício solisita Ministériu Edukasaun atu tau-atensaun didi’ak ba Ensinu Sekundáriu Jerál (ESJ) nune’e bele kompete iha bolsa estudu.
Diretór nota bolsa estudu ne’ebé oferese husi Governu durante ne’e estudante husi eskola privada no Centros de Aprendizagem e Formação Escolar (CAFE) sira mak kompete tanba kestaun lian.
“Bolseiru ne’ebé hala’o estudu iha rai-li’ur no rai-laran maioria husi eskola CAFE, Santo Inácio Loiola no eskola privada sira seluk. Ensinu Sekundáriu Jerál ne’e difísil tebes atu asesu ba lian inglés di’ak nune’e bainhira atu bá estuda iha rai-li’ur ne’e difísil tebes. Tanba ne’e mak husi esperiénsia, ita-boot sira bele habelar informasaun atu diretór eskola sira, Diretór Servisu Edukasaun Munisipál sira tau-matan ba kondisaun ne’e tanba maioria Ensinu Sekundáriu Jerál sira-nia portugés no inglés ne’e difísil uitoan, la’ós ladi’ak maibé tenke hadi’a,” diretór ne’e esplika.
Nia dehan, Servisu Edukasaun Munisipál no Diretór eskola sira tenke tau-matan didi’ak tanba edukasaun ne’ebé di’ak bele sai baze ba dezenvolvimentu.
“Apela ba diretór ba kada eskola sira tenke haree no Servisu Edukasaun Munisipál tenke tau-matan ba ida-ne’e. Edukasaun iha área Ensinu Báziku ne’e importante tanba baze ba dezenvolvimentu ne’e hahú husi ensinu báziku sira,” nia apela.
Jornalista: Osória Marques
Editór: Xisto Freitas da Piedade
