DILI, 19 Dezembru 2025 (TATOLI)-Reprezentante povu iha uma fukun Parlamentu Nasionál, deputadu husi partidu Kmanek Haburas Unidade Nasionál Timoroan (KHUNTO), António Verdial de Sousa, husu ba Ministériu Asuntu Kombatente Libertasaun Nasionál (MAKLN) atu hadi’a sistema atendimentu fixa pagamentu ba direitu pensaun ba kombatente libertasaun nasionál rejistadu 2009.
Nia preokupa katak prosesu pagamentu iha loron hirak ne’e hamosu lamentasaun barak, tanba atu trata fixa pagamentu hein kle’ur to’o kombatente balun oin halai to’o dezmaia no hamosu engarrafamentu.
“Haree ita-nia veteranu no veterana sira ba iha ne’ebá, preokupa tebes ho sistema pagamentu. Husu Governu tau atensaun séria, se bele atendimentu sira ne’e halo kada munisípiu”, nia sujere.
Deputadu husi Partidu Kongresu Nasionál Rekonstrusaun Timorense (CNRT), Patrocínio dos Reis Fernandes, mós reforsa katak presiza hadi’a atendimentu, maibé Governu esforsu atu kumpre obrigasaun hodi halo pagamentu.
Nia fó hanoin katak kombatente sira atu iha pasiénsia hanesan uluk, iha tempu defísil, maibé importante direitu sira ne’e protejidu. “Ema rihun hanesan ne’e, obriga loron ida no rua resibu ba hothotu, se ita pasiénsia iha uitoan, kumpriende, fixa pagamentu ba hotu’’, dehan.
Lembra katak Serbisu Nasionál Ambulánsia Emerjénsia Médika, Institutu Públiku, iha 18 Dezembru, ne’e rejista kombatente na’in-10 dezmaia durante forma atu simu fixa pagamentu iha edifísiu MAKLN, Komoro. Ida-ne’e akontese tanba hamriik kle’ur, moras, no balun hamlaha, maibé laiha ida mak hetan kondisaun grave.
Notísia relevante: https://tatoli.tl/2025/12/15/ohin-kombatente-15-697-simu-fixa-pagamentu-atu-simu-direitu-pensaun/
Jornalista: Nelson de Sousa
Editora: Maria Auxiliadora
