DILI, 24 Dezembru 2025 (TATOLI)—Ekipa futeból femininu S’amuser Football Club to’o iha momentu ida-ne’e (24/12) lidera tabela klasifikasaun kompetisaun primeira divizaun Liga Futeból Femininu Timor-Leste (LFFTL).
S’amuser FC sai kampiaun ba volta dahuluk ho rekor la derota durante jornada dasiak, kompostu manán ualu (8) iha-ne’ebé vense ekipa sira hanesan Kulugisa, VDL, UNITAL, Na’in-Feto, Maranatha, Akadémika no ikus AD SLB, enkuantu impata ho Buibere FC no kolekta golu +52.
Iha pozisaun daruak, okupa husi Buibere ho pontu 22, rezultadu manán hitu (7), derrota ida (1) no impata ida (1), enkuantu AD SLB okupa iha pozisaun datoluk ho pontu 20, rezultadu manán (7), derrota ida (1) no impata ida (1).
Aleinde ne’e, Maudoko FC iha pozisaun ho pontu 17 hafoin manán lima (5), impata rua (2), derrota rua (2), tuir kedas Maranatha FC iha pozisaun dalimak ho pontu 17, rezultadu manán lima (5), derrota rua (2) no impata rua (2).
Akadémika FC rekolla pontu 12, rezultadu manán haat (4) no derrota lima (5), okupa iha pozisaun daneen no UNITAL FC okupa iha pozisaun dahitu ho pontu sia (9), enkuantu Na’in-Feto FC iha pozisaun daualu (8) ho pontu haat (4), hafoin manán ida (1), impata ida (1) no derrota hitu (7).
Entretantu, ekipa rua okupa iha zona mean hanesan VDL FC iha pozisaun dasiak hafoin manán ida (1), impata ida (1) no derrota hitu (7), enkuantu Kulugisa kontinua sofre iha pozisaun dasanuluk ho pontu 0, rezultadu derrota hamutuk sia (9).
Jornalista: Natalino Belo
Editór: Xisto Freitas da Piedade
