DILI, 24 Dezembru 2025 (TATOLI)-Selebrasaun Natál no tinan foun lori ksolok, domin, dame no esperansa ba dezenvolvimentu nasionál.
Nune’e, deputada husi Partidu Libertasaun Populár (PLP), Maria Angelina Sarmento Lopes, hato’o boas festas Santu Natál no feliz anu novu ba timoroan hotu iha rai-laran no diaspóra.
“Natál bele lori ksolok mai ita hotu, liuliu pás no dame no hanesan fiar-na’in atu ita idaidak bele kontribui di’ak liután ba ita-nia rai, nune’e dezenvolve rai ne’e atu povu bele hetan moris di’ak”, nia hato’o.
Nia espera katak ukun-na’in sira bele hala’o kna’ar di’ak liután hodi serbí povu no rai ida-ne’e tuir eroi no mártir sira husik hela mehi ba ukun-rasik an.
“Hein katak governante sira bele asume responsabilidade hodi implementa duni libertasaun povu husi ki’ak”, nia hato’o.
Nune’e mós deputadu husi Partidu Frente Revolusionária Timor-Letse Indepedente (FRETILIN), Antonino Bianco, konsidera Natál loron espesiál ba kristaun tomak iha mundu, inklui Timor-Leste.
Nia espera ho Natál bele hetan grasa ua’in husi ukun-na’in sira to’o ba sidadaun hotu lori naroman ba ema hotu nia laran.
Hodi tama ba tinan 2026 ho espíritu Natál lori kbiit espíritu Santu ba ema hotu, liuliu ba ukun-na’in, servidór Estadu no órgaun soberania hotu atu serbí povu tuir regra.
Deputadu husi Partidu Kongresu Nasionál Rekonstrusaun Timorense (CNRT), Natalino dos Santos, dejeza feliz Natál no tinan foun ba povu tomak.
Nia dehan, 25 Dezembru loron ida universál ba ema hotu sei selebra, liuliu relijiaun Katóliku hanesan loron kmanek ho maksoin moris hias.
Hodi dejeza tinan foun 2026 lori espíritu konfiansa, dame ba país no lori esperansa, liuliu dezenvolvimentu nasionál.
“Ho tinan foun sei lori enérjia foun mai ita hotu. Husu ita hotu hakmatek hodi selebra loron ne’e”, nia hato’o.
Deputadu husi Kmanek Haburas Unidade Nasionál Timoroan (KHUNTO), António Verdial de Sousa, dehan ho Natál fó esperansa, dame no unidade no ho Kristu nia domin ba selebrasaun konvida ema hotu atu halo reflesaun harii nasaun ida metin no justu liu, nakonu ho ksolok.
Notísia relevante: Don Virgílio konvida sarani hotu selebra Natál ho domin, dame no unidade
Jornalista: Nelson de Sousa
Editora: Maria Auxiliadora
