DILI, 05 Janeiru 2026 (TATOLI)—INCANTO Group despede hamutuk ho traballadór timoroan na’in-rua (2) ho naran Kezia Fatima Fernandes no Rosandro Fernandes, antes iha loron 08 fulan-Janeiru tinan 2026 aranka no servisu iha área ospitalidade ho durasaun fulan tolu iha Singapura.
Jerente INCANTO Group, Joanico Jerónimo, hateten iha loron 08 fulan-Janeiru traballadór na’in-rua ne’e sei aranka ona ba servisu iha Singapura iha área ospitalidade ho durasaun fulan tolu, sira-nia dokumentus kompletu hotu ona no hein prepara sira-nia an atu aranka.
“Maske antes ne’e ita identifika kandidatu timoroan na’in-haat maibé tanba rua seluk la prienxe rekezitu lei traballu Singapura nian tanba iha de’it diploma sekundária, nune’e kandidatu na’in-rua maka pasa iha projetu pilotu dahuluk,” Jerente INCANTO Group, Joanico Jerónimo, informa ba jornalista sira iha nia kna’ar fatin, Bidau Lesidere, ohin.
Tamba ne’e, nia husu ba traballadór na’in-rua ne’e atu aproveita oportunidade ida-ne’e atu kapasita sira-nia an iha área turizmu no ospitalidade, esforsu hatudu performa di’ak atu empreza sira bele estende tan sira-nia servisu ba tinan naruk nia laran no loke espasu ba joven sira seluk.
Entretantu, akordu ne’e sira hala’o ona iha tinan 2023 antes Timor-Leste seidauk sai membru ASEAN, maibé bainhira sai ona membru ofisiál ba ASEAN sira kontinua haruka ona traballadór ba servisu iha Singapura.
“Tanba lei la fó dalan ita atu rekruta kualker timoroan hodi ba servisu iha Singapura, nune’e objetivu ida-ne’e mós atu kria kampu traballu no mellora kapasidade timoroan hodi aprende iha área ospitalidade tuir estanda internasionál nian,” nia esplika.
Iha biban ne’e, tuir traballadora, Kezia Fatima Fernandes, sente kontente tebes bele hetan oportunidade ida-ne’e, nune’e nia sei esforsu dedika nia-an hodi servisu ho di’ak atu tane nafatin imajen Timor-Leste nian.
“Oportunidade ida-ne’e hanesan kompetisaun dahuluk ba nia ne’ebé bele sai matadalan ba joven sira seluk atu kontinua aproveita oportunidade hatudu kapasidade no servisu hamutuk ho ema estranjeiru iha nasaun Singapura,” nia dehan.
Notísia Relevante: INCANTO sei fasilita traballadór timoroan na’in-haat ba servisu iha Singapura
Jornalista : Alexandra da Costa
Editór : Cancio Ximenes
