DILI, 07 Janeiru 2026 (TATOLI) – Komisaun D ne’ebé trata Asuntu Ekonomia no Dezenvolvimentu iha Parlamentu Nasionál (PN) halo audiénsia públika ba proposta Lei númeru 21/VI (2a), Lei Pestisida, ne’ebé sei realiza durante loron 14 to’o 16 Janeiru ne’e.
PN sei konvida Ministéiru Agrikultura, Pekuária, Peska no Floresta (MAPPF), Ministériu Turizmu no Ambiente (MTA), Ministériu Saúde (MS), no Ministériu Komérsiu no Indústria (MKI) hodi rona sira-nia hanoin ba inisiativa lejislativa ne’e.
“Lei ne’e liga ba ita-nia produtu agríkola sira, asegura importasaun ai-han, labele liu padraun saúde no ambiente ne’ebé tau ona”, Prezidente Komisaun D, Ricardo Baptista, hateten hafoin ramata sorumutu Komisaun, iha Parlamentu, ohin.
Lejislasaun ne’e presiza tanba país sai ona membru ba Asosiasaun Nasaun Sudeste Aziátiku (ASEAN, sigla inglés) no Organizasaun Mundiál Komérsiu (OMK) liga ho komérsiu internasionál.
Lembra katak, iha 22 Maiu 2025, liuhusi reuniaun Konsellu Ministru aprova ona proposta lei hodi kontrola pestisida iha territóriu nasionál ne’ebé aprezenta husi Ministru Agrikultura, Pekuária, Peska no Floresta, Marcos da Cruz.
Proposta Lei ne’e ho objetivu atu regula lisensiamentu, importasaun no esportasaun, produsaun, fa’an no distribuisaun, utilizasaun, embalajen no soe pestisida sira, inklui pestisida agríkola sira, iha faze hothotu husi sira-nia siklu moris.
Ho objetivu atu proteje saúde ema nian, saúde animál no ai-horis nian, ambiente tasi no terrestre, nune’e mós promove produsaun agríkola ne’ebé sustentavel iha Timor-Leste.
Lejislasaun ne’e importante tebes tanba presiza regula utilizasaun lisensiamentu ba pestisida ai-moruk hodi hamate peste iha natar, to’os, nomós ema balun uza ai-moruk pestisida hodi hamate fali ikan, boek. Nune’e, presiza regula tanba ai-moruk ne’e bele afeta mós ba ema-nia saúde, no animál nia saúde no inklui ai-horis sira.
Notísia relevante: Governu aprova proposta lei atu kontrola pestisida
Jornalista: Nelson de Sousa
Editora: Maria Auxiliadora
