DILI, 09 Janeiru 2026 (TATOLI) – Diresaun Nasionál Transporte Terrestre (DNTT) rekolla, durante tinan 2025, reseita ho valór millaun $7,3 hodi kontribui ba kofre Estadu, informa Xefe Departamentu Sekretariadu Apoiu Tékniku-Administrativu DNTT, Nelson Sequeira.
Dirijente ne’e hateten katak reseita ne’ebé DNTT arrekada iha tinan 2025 ne’e aas liu kompara ho tinan sira seluk, ne’ebé mai husi atividade sira hanesan rejistu veíkulu, inspesaun ba veíkulu importadu, substituisaun livrete, emisaun dokumentu provizóriu hodi substitui livrete orijinál, kria xapa espesiál, emite karta kondusaun, no inspesaun veíkulu sira.
Totál reseita ne’ebé errekada, millaun $1,1 maihusi munisípiu sira, esetu Oekusi, enkuantu Dili kontribui ho millaun $6,2.
“Ita halo komparasaun reseita tinan 2025 mak boot liu hamutuk $7.268.706,50. Reseita ida-ne’e kontribui maka’as husi movimentu transporte iha fronteira iha fim do ano, tanba iha de’it Dezembru ne’e maluk sira ne’ebé halo movimentu bá Indonézia kontribui $2.820”, Nelson Sequeira relata ba Tatoli, iha Balide, ohin.
Nia salienta katak reseita ne’ebé hetan ne’e hatudu katak DNTT la’ós de’it mak gasta orsamentu Estadu, maibé kontribui mós buka osan ba reseita nasionál.
“Ida-ne’e hatudu progresu di’ak ba ita, tanba iha tinan 2024 rekolla de’it reseita millaun $5,7. Ha’u fiar katak ho reseita sira ne’ebé ita kontribui, ba oin Governu mós bele haree kondisaun DNTT nian, tanba fatin atendimentu ba públiku ladún favoravel”, nia sujere.
Notísia relevante: DNTT Bobonaru halibur reseita rihun $152-resin
Jornalista: Arminda Fonseca
Editora: Maria Auxiliadora
