DILI, 13 Janeiru 2026 (TATOLI)—Ministru Ensinu Superiór, Siénsia no Kultura, José Honório da Costa Pereira Jerónimo ho nia delegasaun hala’o misaun ofisiál ida bá Indonézia iha loron 5-7 Janeiru tinan ne’e ho objetivu atu hametin kooperasaun internasionál iha dezenvolvimentu ensinu superiór ne’ebé foku ba área siénsia no teknolojia.
Delegasaun halo viajen dahuluk ba Jember, Provínsia Java Leste iha ne’ebé sira vizita Institutu Siénsia no Teknolojia Mandala, no ba Surabaya, iha ne’ebé sira hala’o enkontru institusionál ho Universidade Estatál Surabaya (UNESA-sigla Indonézia).
Iha enkontru ne’e, bele hetan ona entendimentu kona-ba implementasaun programa investigasaun hamutuk, atribuisaun bolsa estudu, interkámbiu profesór no estudante sira no mós asaun formasaun ba profesór sira, tuir prioridade estratéjika ne’ebé define ona hosi Ministériu Ensinu Superiór, Siénsia no Kultura (MESSK).
Ministru José Honório informa, hanesan rezultadu imediatu husi misaun ne’e, MESSK asesu ba bolsa estudu 100 ne’ebé oferese husi UNESA iha nivel lisensiatura, mestradu no doutoramentu iha área prioridade ba Timor-Leste, no mós bolsa estudu 20 ne’ebé fornese husi Institutu Siénsia no Teknolojia Mandala ba grau lisensiatura no mestradu iha área siénsia informátika, saúde no ekonomia.
“Enkontru sira-ne’e rezulta iha entendimentu ba implementasaun programa konjuntu sira iha área investigasaun, bolsu estudu, interkámbiu dosente no estudante sira no mós formasaun profesór sira-ne’ebé aliñadu ho prioridade estratéjika sira-ne’ebé define husi MESSK,” nia dehan ba TATOLI iha nia knaar fatin, Kolmera, Tersa ne’e.
Misaun ida-ne’e nu’udar parte hosi esforsu kontínuu atu hametin parseria entre Timor-Leste no Indonézia iha área ensinu superiór nian, hodi kontribui ba kualifikasaun rekursu umanu no ba dezenvolvimentu sientífiku no teknolójiku nasionál.
Jornalista: Osória Marques
Editór: Xisto Freitas da Piedade
