DILI, 13 Janeiru 2026 (TATOLI) – Bee Timor-Leste, Empreza Públika (BTL, E.P) arrekada, entre Janeiru no Dezembru 2025, reseita hamutuk $2.116.000.
Reseita ne’ebé kobre mai husi kanalizasaun bee, selu bee kada fulan husi konsumidór, teste bee iha laboratóriu, fa’an bee-moos, fakar bee fo’er iha Tíbar no seluk tan.
“Ami-ninia espetativa ka alvu iha 2025 ne’e atu rekolla reseita hamutuk millaun $2,4, maibé atinje de’it 98% ka $2.116.000”, Prezidente Konsellu Ezekutivu BTL, E.P, Gustavo da Cruz, informa iha Kaikoli, ohin.
Nia esplika razaun BTL rekolla reseita la to’o alvu, tanba alargamentu no melloramentu estrada sira ne’ebé halo iha Dili kontribui ba halakon konsumidór lubuk ida atu seluk reseita ba BTL.
“Maske tinan ne’e rekolla r,eseita ki’ik maibé ho melloramentu sira ne’ebé iha hanesan atinjimentu ne’ebé di’ak atu dudu nafatin ami hodi bele mellora tan de’it sistema sira, nune’e 2026 ne’e ami bele hetan reseita di’ak, bele kobre alvu millaun $3 iha tinan ne’e”, dehan.
Tuir nia, husi reseita ne’ebé BTL rekolla ne’e halo poupansa ba Orsamentu Jerál Estadu (OJE) iha 2025 hamutuk millaun $2.
Nia esplika OJE ba BTL ne’ebé transferé husi Ministériu Obra Públika tuir planu hamutuk millaun $10, maibé to’o tinan nia rohan transfere de’it millaun $8.
“Ida-ne’e ami poupa millaun $2 hodi responde ba nesesidade ministériu nian hodi atende ba eviksaun [despezu administrativu] sira ne’ebé la’o, tanba halo alargamentu ba estrada sira, entaun orsamentu ne’e selu ba indemnizasaun”, dehan.
Lembra katak, iha 2021, BTL transforma ba empreza públika no kontribui reseita ba Estadu. Tuir estimativa, iha 2021, BTL presiza rekolla reseita rihun $170 no iha nia implementasaun arrekada $256.461. Iha 2022, tau estimativa rihun $250 no konsege ultrapasa ba $611.532. Iha 2023, hasa’e projesaun ba $948.005 no rekolla millaun $1 no iha 2024, hasa’e ba millaun $1 no arrekada millaun $1,6-resin.
Notísia relevante: BTL, E.P arrekada reseita millaun $1,6 iha trimestre datoluk 2025
Jornalista: Arminda Fonseca
Editora: Maria Auxiliadora
