DILI, 13 Janeiru 2026 (TATOLI)-Parlamentu Nasionál, liuhusi reuniaun plenária, aprova proposta Lei númeru 19/VI (2a) Konkorrénsia iha faze jeneralidade ho votu a favór 57, kontra no abstesaun 0.
“Lei ne’e pasa iha jeneralidade, hatún fali ba Komisaun D kontinua debate iha espesialidade”, Prezidente Parlamentu Nasionál, Maria Fernanda Lay, fó sai iha sala plenária, ohin.
Vise-Primeiru-Ministru ba Asuntu Ekonómiku no Ministru Koordenadór ba Asuntu Ekonómiku, Francisco Kalbuadi Lay, hateten ho aprovasaun lei ne’e reprezenta pasu istóriku no urjente ida ne’ebé ba maturidade ekonómika Timor-Leste nian.
“Diploma ida-ne’e rezultadu husi esforsu husi Governu Konstituionsionál Dasiak atu moderniza ordenamentu jurídiku nasionál no aliña ita-nia rai ho prátika di’ak sira iha mundu tomak’’, nia dehan.
Hodi salienta, atualmente, falta regulamentu espesífiku ne’ebé fó fatin ba prátika anti kompetitivu sira ne’ebé estraga merkadu, prejudika empreza ki’ik no médiu sira no hasa’e kustu moris ba sidadaun sira-nia.
‘’Objetivu mak tenke lori lei ne’e mai iha ne’e atu aprova, promove no proteje ho kompetisaun livre iha merkadu nasionál sira, prevee prátika monopolístiku no anti kompetisaun no reflete kompromisu Estadu nian atu harii merkadu ida ne’ebé kompetetivu, ekuitativu no transparante”, esplika.
Proposta Lei Konkorrénsia ne’e iha artigu hamutuk 29. Lei ne’e nia objetivu mak atu promove no proteje livre konkorrénsia iha merkadu, hatudu kompromisu Estadu atu hadi’a ekonomia, aumenta kooperasaun internasionál, no fó benefísiu ba sosiedade.
Lei ne’e regula prátika restritiva konkorrénsia ba atividade ekonómika hotu, hakerek kompeténsia ba autoridade públika atu investiga, fó sansaun no halo prevensaun.
Tuir relatóriu no pareser Komisaun D ne’ebé trata Asuntu Ekonomia no Dezenvolvimentu, apresiasaun inisiál proposta lei ne’e kumpri rekizitu konstitusionál atu alo diskusaun no aprovasaun iha plenária, iha faze jeneralidade tanba fundamentál iha ekonomia país.
Notísia relevante: https://tatoli.tl/2025/07/09/inisia-audiensia-publika-ba-proposta-lei-konkorrensia/
Jornalista: Nelson de Sousa
Editora: Maria Auxiliadora
