DILI, 16 Maiu 2026 (TATOLI)–Liga Futeból Timor-Leste (LFTL), realiza reuniaun tékniku ho klubu 10 ne’ebe sei partisipa jogu segunda divizaun, iha époka ne’e, ne’ebé tuir planu sei halo abertura iha loron 26 Maiu tinan ne’e.
Klubu sira dada ona númeru sorteu ba jogu segunda divizaun nian, ne’ebé fahe ba grupu rua, kompostu husi grupu A no B. Iha grupu A kompostu husi klubu lima mak hanesan Fiel Fc, Negaradgo, As Ponta Leste, Vila Ataúro Fc, no Ad Santo Antonio. Enkuantu, husi grupu B kompostu husi klubu lima hanesan Akadémika Fc, Lica-Lica Lemorai, Hibers Dili Fc, AC Mamura no Weasel Fc.
“Enkontru ohin loron importante tanba ita halo technical meeting ba klubu 10 ne’ebé sei partisipa iha liga futeból Timor-Leste segunda divizaun époka ne’e, ne’ebé sei halo abertura iha loron 26 Maiu ne’e no sei ramata iha 11 Juñu tinan ne’e. Tanba tuir informasaun ne’ebé ami hetan, iha Fulan-Agostu sei hahú reabilitasaun ba estádiu,” Koordenadór Kompetisaun LFTL, Frederico Martins, hateten ba Jornalista sira, iha Estádiu Munisipál Dili, Sábadu ne’e.
Nia informa, prémiu ba manán-na’in sira mak hanesan ekipa kampiaun sei hetan orsamentu ho montante $10.000, taxa ida no medalla.
Notísia relevante : Governu prevee $500.000 ba LFTL realiza liga futeból 2026
Durante jogu, parte LFTL sei atribui mós prémiu ba klubu sira hanesan subsídiu, kada klubu ho montante $8.000, prémiu kada jogu osan ho montante $1.000, ba klubu ne’ebé manán hetan prémiu ho nia osan $700, klubu ne’e derrota hetan prémiu $300 no empata sei hetan $500 kada ekipa.
“Haree ba forsa orsamentu ne’ebé iha, ita sei kobre de’it ba jogu 44. Sistema jogu kada klubu sei hasoru malu dala-ida de’it,” nia akresenta.
Frederico hatutan, kona-ba pagamentu ba prémiu jogu ba segunda divizaun nia sistema pagamentu, bainhira jogu faze grupu termina, hafoin mak halo pagamentu ba klubu sira.
Nune’e mós, LFTL sei fó tan prazu ba klubu sira ne’ebé seidauk submete dokumentu no lista jogadór atubele submete dokumentu.
“Ita-nia janela transferénsia loke iha 17 Abríl no taka ona iha 09 Maiu liubá, nune’e maioria klubu submete ona dokumentu mai, maibé la tuir formatu ne’ebé ekipa Liga prepara ona, entaun ita husu sira atu submete lista jogadór tuir formatu ne’ebé ita fó,” Frederico esplika.
Koordenadór dehan, kona-ba sansaun ne’e, karik klubu ne’ebé la submete dokumentu sei la tuir jogu. Enkuantu, parte LFTL rejista ona jogadór estranjeiru kuaze na’in-20 resin ne’ebé sei reforsa klubu sira iha segunda divizaun.
“Maibé ita sei halo verifikasaun, bele hamenus ka bele mós aumenta. Husi jogadór 20-resin ne’e maihusi Indonézia, Japaun, Áfrika no jogadór estranjeiru ne’ebé sei tun iha kampu na’in-tolu de’it,” nia katak.
Purtantu, jogu LFTL segunda divizaun tinan-ne’e sei laiha degradasaun, maibé sei halo de’it promosaun ba klubu hodi ba primeira divizaun.
Jornalista : Osória Marques
Editora : Julia Chatarina
