DILI, 15 Janeiru 2026 (TATOLI)–Movimentu Juventude Ossú-oan, husu Ministériu Edukasaun (ME) atu anula desizaun taka Klase Paralela Sekundária Olokasa iha Suku Uagia, Postu Administrativu Ossú, Munisípiu Vikeke.
Portavós Movimentu Juventude Ossú-oan, Ason Maubere, diskorda ho desizaun Ministériu Edukasaun nian ba taka eskola paralela ne’e tanba lahó desizaun fundamenta no la bazeia ba realidade ne’ebé komunidade enfrenta iha baze.
“Ita hotu hatene edukasaun hanesan direitu báziku ba sidadaun hotu-hotu atu asesu ba edukasaun, maibé polítika Governu liuhusi Ministériu Edukasaun taka eskola paralela ne’e lahó desizaun koletiva no la tuir realidade ne’ebé ezise,” nia dehan ba jornalista sira liuhusi konferénsia imprensa iha Jardín 05 Maiu, Kolmera, Kinta ne’e.
Juventude konsidera deklarasaun Diretór Nasionál Ensinu Sekundáriu Jerál, Benjamin Fernandes katak Eskola Filiál Uagia taka tanba rekursu umanu limitadu, deklarasaun ida-ne’e kontrariu ho diploma ministeriál nian.
Tuir nia, iha Diploma Ministeriál artigu 4 katak estudante tenke ho estudante hamutuk 120, la’ós pur klase, tanba ne’e husu ministériu atu analiza asuntu ne’e halo didi’ak.
Notísia relevante: Inan-aman no veteranu halo asaun pasífika hasoru desizaun taka Eskola Sekundária Filiál Olokasa
“Ami lamenta tebes ho desizaun ida-ne’e, tanba nia efeitu negativu ba estudante sira. Nune’e, ami reafirma ami-nia pozisaun katak klase ne’e tenke reativa fali,” nia dehan.
Portavóz ne’e deklara katak karik klase ne’e mak la reativa, sira sei mobiliza forsa hodi halo asaun pasífika hasoru Ministériu Edukasaun.
Iha fatin hanesan, Juventude Movimentu Ossú-oan, Crispin da Silva Gomes, husu Ministériu Edukasaun imediatamente atu anula desizaun ne’e, más karik ministériu la anula desizaun, joven sira sei hamutuk ho inan-aman no veteranu blokeia Eskola Sentrál Ossú.
“Karik iha semana oin ne’e laiha desizaun, ami sei bá hamutuk ho inan-aman, veteranu, blokeia totál eskola Sekundária Jerál Sentrál Ossú, para eskola rua ne’e taka hotu. Se ida loke ida taka, ida ne’e fó hela sofrimentu ba ita-nia alin hamutuk 187, tanba sira tenke la’o distánsia dook,” nia deklara.
Nia esplika, bainhira klase ne’e taka, estudante husi suku neen (6) hanesan Nahareka tenke la’o kilómetru 20, Uaibobo la’o kilómetru 18, Builó la’o kilómetru 12, Ossorua la’o kilómetru sia (9), Uagia la’o kilómetru hitu (7) hafoin bele asesu ba Eskola Sekundária Sentrál Olokasa.
“Tanba de’it la’o ho distánsia dook hodi asesu ba edukasaun, referénsia ne’ebé iha 2015, ita-nia alin feto na’in-rua (2) depoiz eskola sai fila bá uma mota Webere lori to’o agora familia la hetan nia isin-mate. Ho ida-ne’e ami husu Ministériu Edukasaun atu anula desizaun no fó fali espasu ba estudante sira husi mota sorin atu hala’o fali prosesu aprendizajen hanesan baibain,” nia haktuir.
Nune’e mós, Frenky Erjon reforsa katak husi baze Dekretu-Lei nú. 33/2023, 31 Maiu, kona-ba estabelesimentu Ensinu Sekundáriu Filiál Uagia, ho objetivu atu lori edukasaun hakbesik ba povu hodi asesu.
Nia hateten, ho estabelesimentu eskola ne’e, tulun tebes estudante iha suku neen hanesan Uagia, Ossorua, Uabobu, Uaibobo, Builó, Nahareka, atu asesu bá eskola liuliu ensinu sekundáriu, tanba durante estudante sira husi suku neen atu asesu edukasaun iha nivel sekundáriu tenke la’o ho distánsia dook hafoin to’o iha Postu Administrativu Ossú Vila.
Maibe, infelizmente Ministériu Edukasaun liuhusi Diploma Ministeriál nú. 23/25, 13 Agostu, deside taka klase referida, ho razaun menus rekursu umanu ka estudante la to’o.
“Ho desizaun ne’e ami Ossú-oan haree katak ida-ne’e insultu boot ba povu aileba nia oan, tanba hamate sira-nia direitu atu asesu ba edukasaun no hakoi futuru destinu povu aleba nia oan,” nia reals.
Juventude ne’e mos lamenta ho desizaun Diretora Ensinu Sekundáriu Sentrál Olokasa, Eltida Ruas Guterres, tanba sein konsulta ho komunidade suku neen, hodi aprezenta problema ne’ebé klase paralela enfrenta, maibé uza nia podér hodi foti desizaun ho nonook.
“Tanba ne’e, ami estudante no juventude Postu Administrativu Ossú, liuliu suku neen, husu ba Prezidente Repúblika, José Ramos Horta, atu halo anulasaun ba Diploma Ministeriál nú. 23/2025, 13 Agostu, ho imediatamente,” nia husu.
Aliende ne’e, sira mós husu diretór Servisu Edukasaun Munisipiu no Ministériu Edukasaun atu foti desizaun labele tuir de’it indivíduu ida nia interese, maibé tenke tetu no analiza tuir realidade ba interese komún.
Jornalista: Osória Marques
Editór: Xisto Freitas da Piedade
