DILI, 16 Janeiru 2026 (TATOLI)—Autoridade Munisipál Baukau (AMB) iha Kinta (15/01) atribui ona envolope fiskál orsamentu jerál Estadu 2026 ba serbisu munisipál inklui administradór postu administrativu.
Prezidente Autoridade Munisípiu Baukau, Veneranda Eurico Lemos Martins esplika atividade atribuisaun envelope fiskál referidu ho objetivu introdús regra ba implementasaun orsamentu nian liuliu ba kargu diretór serbisu munisipál inklui administradór postu sira ligadu ho regra ezekusaun orsamentu hamutuk ho programa sira hotu.
“Tinan-ne’e, ha’u bele dehan tinan rigorozu uitoan ba implementasaun orsamentu sira no mós ba programa sira-ne’ebé aprovadu hotu ona,” Prezidente Autoridade Munisipál Baukau hateten liuhusi komunikadu ne’ebé TATOLI asesu, Sesta ne’e.
Veneranda iha esperansa katak dirijente iha Baukau kumpri regra ezekusaun bazeia ba programa hotu ho kualidade tanba iha tinan-ne’e AMB hetan mudansa orsamentu bazeia ba taxa ezekusaun orsamentu 2025 ne’ebé atinji pursentu 97 bainhira kompara ho 2024 ne’ebé ezekuta to’o pursentu 89.
Nune’e, tinan 2026 sai sasukat ba Autoridade Munisípiu Baukau nia kapasidade ezekusaun orsamentu ne’ebé hamutuk $13.802.085 ne’ebé aloka ba saláriu no vensimentu, bens no servisu, transferénsia públika, kapitál menór no kapitál dezenvolvimentu.
“Sira hotu tenke hatene, iha primeiru trimestrál tenke aprezenta ona ezekusaun orsamentu, maibé ha’u kontente, tanba sira hotu servisu ho dedikasaun tebes no iha kapasidade atu lidera,” Veneranda subliña.
Entretantu, orsamentu 2026 ne’ebé aloka ba AMB hamutuk $13.802.085, iha-ne’ebé aloka ba saláriu no vensimentu $2.850.742, kapitál menór $150.000, transferénsia públika $7.725.580, kapitál dezenvolvimentu $ 2.310.213 no bens no servisu $765.550.
Jornalista: Natalino Belo
Editór: Xisto Freitas da Piedade
