DILI, 19 Janeiru 2026 (TATOLI)-Konstrusaun edifísiu Sentru Arkivu foun Centro Nacional Chega!, Institutu Públiku (CNC, I.P) atinje ona 99%, informa Diretór-Ezekutivu Centro Nacional Chega, Hugo Maria Fernandes.
Nia dehan falta de’it instala jeradór iha semana ne’e no bainhira hotu emreza entrega ona ba CNC.
“Bainhira entrega tiha sei iha tempu fulan rua ka tolu ba CNC tenke tau sasán sira ba laran no instala ekipamentu sira hotu. Ami-nia planu ne’e dalaruma fin Marsu la’e Abríl tinan ne’e inaugura ona”, nia informa.
Sentru Arkivu foun ne’e nia basement sei uza ba salaun enkontru no rai dokumentu sira.
Antes ne’e, Diretór-Ezekutivu CNC dehan estabelesimentu Sentru Arkivu ne’e atu akumula dokumentu hotu ne’ebé daudaun ne’e rai hela iha Sentru Arkivu iha antigun Komarka Balide.
“Ita iha dokumentu rihun 50-resin, arkivu istóriku ne’ebé liga ho dokumentu sira no aktu violasaun direitu humanu ne’ebé komete husi militár indonéziu sira, nomós husi ita timoroan, hahú husi períodu 1974 to’o 1999”, dehan.
Aleinde prezerva, CNC mós iha polítika kona-ba kolesaun mak oinsá bele halibur tan dokumentu sira seluk, tanba dokumentu ne’ebé daudaun ne’e iha CNC ladún kompletu, entaun presiza tan dokumentu sira seluk.
Lembra katak konstrusaun ba edifísiu Sentru Arkivu foun CNC halo kooperasaun ho Ministériu Planeamentu no Investimentu Estratéjiku no Sekretariadu Grande Projetu (SGP) hodi harii edifisiu ne’e ho kustu $941.103,73 no toma konta husi empreza nasionál rua ne’ebé halo konsórsiu hanesan Nazareth Unipessoal Lda. hamutuk ho Quatro Colegas Lda.
Jornalista: Arminda Fonseca
Editora: Maria Auxiliadora
