VIKEKE, 19 Janeiru 2026 (TATOLI)—Diretór Ensinu Sekundáriu Tékniku Vokasionál (ESTV) Ravina, Postu Administrativu Lakluta, Munisípiu Vikeke, Rosito Soares Morais informa daudaun ne’e ESTV Ravina Lakluta sei menus profesór sira.
“Ami sei menus profesór ba disiplina sira hanesan relijiaun, lian portugeza, siénsia fízika no área departamentu produtivu no departamentu informátika,” Rosito Soares Morais ba TATOLI iha Postu Lakluta, Segunda ne’e.
Nia esplika presiza profesór hamutuk na’in-15 hodibele prenxe matéria sira.
“Durante ne’e, ami menus profesór. Alternativu ne’ebé iha hodi solusiona asuntu ne’e mak kada profesór tenke lori matéria rua to’o tolu hodi hanorin estudante sira,” Rosito hatutan.
Nia dehan kestaun ne’e sira relata beibeik ba Servisu Edukasaun Munisípiu Vikeke maibé seidauk iha solusaun.
“Foin lalais ne’e ami simu profesór bolsa kandidatu hamutuk na’in-tolu mak koloka iha ami-nia eskola, maibé koloka fali profesór sira hanesan disiplina siénsia téknolojia na’in-ida (1), kímika na’in-ida (1) no disiplina matemátika na’in-ida. Tan ne’e, ami husu ba Ministériu Edukasaun (ME) presiza koloka profesór sira bazeia ba disiplina sira-ne’ebé profesór laiha,” Rosito haktuir.
Tuir dadus, estudante ESTV Ravina Lakluta hamutuk na’in-165, kompostu husi 1.o klase na’in-72, 2.o klase hamutuk na’in-44 no 3.o klase hamutuk na’in-34 no totál profesór atuál hamutuk na’in-13.
Iha fatin ketak, Diretór Servisu Edukasaun Munisípiu Vikeke, Júlio Sakadura hateten, kona-ba preokupasaun ESTV Rabina Lakluta ne’ebé menus profesór, parte Servisu Edukasaun Munisípiu Vikeke sei fó-atensaun, bá-oin ME rekruta karik sei koloka ba disiplina sira-ne’ebé profesór laiha.
“Kolokasaun bolsa kandidatu ne’e la tuir disiplina sira-ne’ebé profesór laiha tanba aloka mai hanesan ne’e duni. Ida-ne’e akontese mós ba eskola sekundáriu sira seluk iha Vikeke. Ita kontinua hato’o ba nasionál hodi kompleta ba disiplina sira-ne’ebé profesór seidauk iha,” nia tenik.
Jornalista: Vitorino Lopes da Costa
Editór: Xisto Freitas da Piedade
