BOBONARU, 24 Janeiru 2026 (TATOLI) – Inan isin-rua, Honória Soares Maria, lakon nia bebé tanba kauza husi prosesu transferénsia ne’ebé tarde husi suku Raiheu, postu administrativu Kailaku, munisípiu Bobonaru, bá Ospitál Referénsia Maliana.
Iha loron 23 Janeiru ne’e, inan isin-rua ne’e atu partu iha postu saúde Raiheu, maibé tanba parteira sira susar halo atendimentu, nune’e deside transfere bá ospitál referénsia. Prosesu transferénsia ne’e tarde tanba kondisaun estrada ne’ebé ladi’ak no distánsia bá ospitál dook maka afeta ba bebé nia kondisaun.
Diretór-Ezekutivu Ospitál Referénsia Maliana, José Marçal da Cruz, admite katak bebé ne’e mate, tanba prosesu transferénsia tarde. “Sim, fatór sira bele husi família, petugas, estrada, tanba iha área remota, suku Raiheu estrada la asesu, rai monu taka estrada, klima tempu udan”, nian esplika ba Tatoli.
Ho kestaun ne’e, José Marçal da Cruz, afirma katak parte ospitál sei halo koordenasaun ho Diretór Servisu Saúde Munisípiu Bobonaru hodi bolu parteira sira halo avaliasaun kona-ba sistema transferénsia pasiente bá ospitál, nune’e kazu hanesan ne’e labele akontese tan iha futuru.
Iha momentu ne’e, komunidade sira iha suku Raiheu obrigadu organiza malu hodi “hulan” inan isin-rua, Honória Soares Maria, atu bá partu iha Ospitál Referénsia Maliana.
Xefe Suku Raiheu, Ventura Maria Tai, esplika katak komunidade “hulan” inan-feton ne’e la’o-ain ho distánsia pur volta kilómetru ualu no to’o iha parte Hali Mesak mak foin tula ba karreta ambulánsia, tanba kondisaun estrada la di’ak no hetan etragu totál hafoin akontesimentu udan-boot semana ne’e.
Ventura Maia relata katak tanba prosesu trasnferénsia ho distansia ne’ebé do’ok inan-feton ne’e konsege partu duni bebé feto ida ho normál iha ospitál Maliana, maibé la konsege salva bebe nia vida.
Notísia relevante: Komunidade Raiheu loke estrada foun kilómetru ha’at
“Hanesan autoridade lokál, ha’u sente triste tebes. Se ita sedu no transporte ne’e bele asesu karik ita bele salva bebé ne’e, maibé tanba la’o dook, estrada mós la di’ak ne’e mak ita labele salva bebé nia vida”, nia informa ba Tatoli, iha sábadu ne’e.
Ventura hatutan katak estrada husi Hali Mesak bá Maganuntu, bá Suku Raiheu, daudaun kondisaun aat tebes. Maski projetu hadi’a estrada sei la’o hela iha área Hali Mesak nian, maibe seidauk to’o iha suku Raiheu. Situasaun ida-ne’e difikulta tebes komunidade, liuliu bainhira hasoru situasaun emerjénsia hanesan asisténsia saude.
“Lori komunidade Raiheu nia naran husu ba Governu atu tau atensaun séria ba kondisaun estrada ne’e. Ita hetan difikuldade iha tinan barak nia laran, liuliu iha tempu udan”, nia hato’o.
Hoid espera katak Governu sei foti medida konkreta hodi hadi’a estrada atu garante seguransa no asesu ba servisu báziku ba rezidente lokál sira.
Notísia relevante: Abitante Raiheu kontinua sunu lampariña
Jornalista: Sergio da Cruz
Editora: Maria Auxiliadora
