DILI, 26 Janeiru 2026 (TATOLI)—Ministru Ensinu Superior, Siénsia no Kultura, José Honório da Costa Pereira Jerónimo, hateten atu muda Departamentu Desportu husi Diploma III ba lisensiatura ne’e universidade mak iha kompeténsia.
“Ita hein reitór foun karik iha polítika atu hadi’a Departamentu Desportu atubele ba lisensiatura ne’e laiha problema. Importante UNTL prepara ema ka dosente atu hanorin desportu,” nia dehan ba TATOLI bainhira partisipa iha serimónia graduasaun UNITAL ba dala XVI, iha Sentru Konvensaun Dili (CCD-sigla portugeza), Segunda ne’e.
Ministru José Jerónimo akresenta MESSK disponivel kuandu UNTL hatama posposta maibé tenke prenxe kritériu hanesan dosente iha ka lae, dosente atu hanorin na’in hira, fatin adekuadu ka lae, ida-ne’e presiza haree.
“MESSk nakloke ba universidade atu submete nia proposta ligadu kursu foun ruma,” nia dehan.
Notísia relevante: Estudante UNTL solisita Reitór Eleitu no MESSK transforma Departamentu Desportu ba lisensiatura
Entretantu, Vise Diretór Departamentu Edukasaun Fízika no Desportu UNTL, Francisco Barbosa Pereira, informa tinan barak ona sira halo esforsu, no aprezenta kestaun ne’e ba Konsellu Jerál UNTL maibé estrutura reitór dada to’o agora.
“Ami prontu nafatin, tanba ami-nia inisiativa hakarak kursu Departamentu Desportu tenke eleva ba lisensiatura tanba iha peskiza ne’ebé ami halo maioria eskola sira iha Timor-Leste profesór ne’ebé hanorin maioria husi área seluk mak hanorin, maibé ita-nia graduadu barak liu responde iha eskola sira iha kapitál Dili,” nia subliña.
Maibé, tuir nia, eskola sira iha territóriu nasionál, ba aula matéria desportu profesór fó de’it bola ba estudante sira halimar, laiha ema ida mak lidera.
“Ita presiza rekruta estudante graduadu sira atubele responde. Ita labele hein lisensiatura depoiz ita sakrifika estudante sira iha eskola. Maibé, sira iha direitu atu iha siénsia ne’ebé loos husi ema ne’ebé loos,” nia tenik.
Jornalista: Osória Marques
Editór: Xisto Freitas da Piedade
