DILI, 05 Fevereiru 2026 (TATOLI)—Diretór Servisu Apoiu Diagnostiku no Terapéutiku, Vidal de Jesus Lopes, informa husi Janeiru to’o Fevereiru nia hahú ne’e, labarik na’in-hitu (7) mak mate iha Hospitál Nasionál Guido Valadares (HNGV) tanba moras dengue.
“Husi loron 01 Janeiru to’o 05 Fevereiru 2026, Hospitál Nasionál Guido Valadares (HNGV) rejista pasiente moras dengue hamutuk 478. Husi númeru ne’e, ema na’in hitu mak mate, pasiente 101 tama iha ospitál simu hela tratamentu no alta na’in 370,” nia hateten ba jornalista sira iha nia kna’ar fatin, ohin.
Nia informa, la’ós pasiente hotu-hotu hetan tratamentu de’it iha Hospitál Nasionál Guido Valadares maibé pasiente balun transfere ba Ospitál Temporáriu Kuarentena Tasi-Tolu no Hospital Antonio Carvalho Lahane.
“Agora daudaun pasiente na’in 10 de’it mak halo hela tratamentu iha Tasi-Tolu, ne’e signifika kama disponivel nafatin. Pasiente sira-ne’ebé refere ba Unidade Kuarentena Tasi Tolu ne’e iha kazu kma’an dengue nian, enkuantu kazu dengue grave hotu-hotu halo hela tratamentu iha HNGV,” nia dehan.
Nia haktuir, kazu sira ne’e refere husi sentru saúde Dili laran mak barak hanesan Sentru saúde Formosa, Bekora, Komoro no Vera Kruz no agora mai husi munisípiu mak Likisá no Ermera.
Maibé, nia dehan, dirijente HNGV informa ona ba Xefe sentru saúde sira katak banhira haree kazu kmaan halo tratamentu iha sira-nia fatin maibé se haree ba kazu dengue grave mak halo transferénsia mai iha HNGV.
Tanba ne’e, husu ba komunidade hotu hotu tenke kontribui ijene ambientál ne’e importante, hanesan bee nalihun iha uma hun no jardim tenke hamoos, lata mamuk sira tau iha nia fatin tanba foer sira-ne’ebé barak mak susuk gosta moris iha ne’eba hodi tata labarik sira.
Jornalista : Felicidade Ximenes
Editór : Cancio Ximenes
