DILI, 05 Fevereiru 2026 (TATOLI)—Arsebispu Arkidooseze Metropolitana Dili, Dom Virgílio Kardeál do Carmo da Silva, hateten igreja komprometidu sei hadi’a sistema atendimentu ba sarani sira trata dokumentu iha kartóriu kada parokia iha Dioseze Dili, Baucau no Maliana.
“Servisu ida-ne’e dioseze ida-idak haree ona oinsá atu bele mellora sira-nia kondisaun hodi hatán ba iha tratamentu sertidaun sira iha kartóriu kada parokiál dioseze ida-idak. Nune’e estrutura ida-idak ne’ebé iha kompeténsia atu oinsá avalia servisu interna hodi mellora di’ak liután atendimentu kartória iha igreja sira,” Dom Virgílio Kardeál hateten ba jornalista sira iha hafoin hasoru malu ho Xefe Governu, Kay Rala Xanana Gusmão, iha Palásiu Governu, ohin.
Tamba ne’e, nia dehan, Amu Bispu sira kontinua hamutuk nafatin hodi enkoraja canselera (ema sira-ne’ebé servisu halo sertidaun nian) atu bele fó atendementu ne’ebé mak di’ak ba sarani sira bainhira trata dokumentu sira ho tipu sertidaun batizmu, kazamentu no óbitu.
“Loos duni, durante iha tinan hirak nia laran, ami haree katak iha kongresu boot ida mak presiza atu hadi’a, ne’e sempre no sein dúvida. Maske sira mós dalaruma sempre iha fallansu maibé kontinua esforsu atu hadi’a prosesu atendimentu sira-ne’e,” bispu ne’e dehan.
Jornalista : Alexandra da Costa
Editór : Cancio Ximenes
