VIKEKE, 06 Marsu 2026 (TATOLI)—Koordenadór Sentru Saúde Internamentu Munisípiu Vikeke, Francisco da Costa, informa hahú husi fulan-Janeiru to’o Fevereiru tinan ne’e Sentru Internamentu Vikeke rejista kazu moras fuan hamutuk na’in-sanulu, maioria ema idade.
“Kazu ne’ebé ami rejista husi fulan-Janeiru mai to’o Fevereiru ne’e kazu pulmaun hanesan pnemonia no asma hamutuk ema na’in-sanulu. Husi númeru kazu ne’e maioria ema katuas terseira idade sira mak afetadu ba moras ida-ne’e,” Francisco da Costa ba jonalista sira iha Sentru Internamentu Vikeke, Sesta ne’e.
Nia relata, husi númeru kazu ne’e, pasiénte na’in-sia (9) rekupera ona, hela na’in-ida mak kontinua baixa iha internamentu.
Nia dehan, kona-ba tratamentu ba kazu moras pulmaun referidu, pesoál saúde sira fó tratamentu antibiótiku, ampisillin no vitamina.
“Kona-ba ai-moruk ita sufisiente hodi fó tratamentu ba ita-nia pasiente moras pulmaun sira. Ami haree kuandu pasiente sira baixa liu loron rua ka tolu pasiente sira-nia kondisaun laiha mudansa, ami tenke halo transferénsia ba Baukau hodi hetan tratamentu kompletu husi médiku espesialista sira,” Francisco akresenta.
Entretantu, pesoál saúde servisu iha Sentru Saúde Internamentu Vikeke hamutuk na’in-20, kompostu husi enfermeiru na’in-14 no médiku na’in-neen (6).
Jornalista: Vitorino Lopes da Costa
Editór: Xisto Freitas da Piedade
