BAUKAU, 10 Marsu 2026 (TATOLI)—Konfrontu entre joven iha Suku Uailili, Postu Administrativu Baukau vila rezulta uma komunidade hetan estraga.
Tuir kronolojia, komunidade hala’o jogu voleiból iha Suku Uailili, Segunda (09/03/2026), mosu akontesimentu baku malu entre joven tanba mosu dezentendimentu purvolta tuku 17:00 Otl, mezmu problema referidu Ofisiál Polísia Suku (OPS) halo ona prevensaun liuhusi atuasaun, maibé kontinua halo asaun hodi estraga suspeitu nia uma purvolta tuku 21:06 iha área Daregata.
“Ami sente triste no husu ba autoridade suku no OPS atu buka tuir autór hodi rezolve lalais nune’e ami sente seguru,” abitante Domingas da Costa Ximenes hateten iha Daregata, Suku Uailili, Tersa ne’e.
Iha fatin hanesan, vítima Beatriz da Costa Ximenes, sente triste ho asaun masa husi joven sira-ne’ebé hamosu instabilidade liuliu rezulta uma no sasán hetan estragu nune’e husu ba autoridade kompetente atu prosesa kazu referidu tuir lei ne’ebé vigora.
“Tenke buka tuir para kazu ne’e bá-oin,’ Beatriz rekomenda.
To’o notísia ne’e publika, TATOLI koko halo konfirmasaun ba Komandu Polísia Nasionál Timor-Leste (PNTL) Munisípiu Baukau maibé laiha komentáriu tanba komandante hala’o serbisu iha nasionál.
Entretantu, kazu referidu rezulta uma rua (baraka) hetan sunu no ida estragu (harahun kalén didin uma), seluk mak motór marka Verza ida hetan estragu inklui hamate animál (manu) rua.
Jornalista: Natalino Belo
Editór: Xisto Freitas da Piedade
