BOBONARU, 19 Marsu 2026 (TATOLI) – Ministériu Obra Públika (MOP) monta kontentór hodi halo normalizasaun ba Ponte Bulobu, iha área Samutaben, suku Manapa, postu administrativu Kailaku, munisípiu Bobonaru, ne’ebé hetan danus tanba kauza husi korente bee-mota forte hafoin udan ho intensidade boot iha semana ne’e.
Medida ida-ne’e halo atu loke asesu ba transporte públiku no privadu iha tempu badak hodi bele asesu bá-mai.
Koordenadór Infraestrutura MOP iha munisípiu Bobonaru, Fernando de Fátima, hateten uza kontentór ne’e hanesan solusaun provizóriu atu normaliza dalan.
Motorista Júlio de Fátima Fernande agradese ba intervensaun husi MOP no fiar katak téknika foun ne’ebé daudaun MOP implementa bele dura no salva estrutura ponte Bulobu.
“Uluk ne’e uza karon zumbo cement nian hodi tau fatuk ho rai ne’e mak mota mai sobu. Agora tau fali container ne’e ita haree di’ak, tanba hatuur hotu tiha, ko’a fali nia leten mak enxe rai ho fatuk, hotu mak aterru hodi ita liu bá-mai. Ida-ne’e ita haree forsa iha atu hasoru presaun bee”, nia dehan.
Daudaun ne’e movimentasaun karreta sira parsadu, enkuantu motór komunidade sira ajuda malu hodi hulan hakur mota.
Notísia relevante: PN solisita ba IGEADI halo intervensaun urjente ba ponte Bulobu
Jornalista: Sergio da Cruz
Editora: Maria Auxiliadora
