OEKUSI, 24 Marsu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Diresaun Rejionál Edukasaun no Solidariedade Sosiál, planeia atu harii konstrusaun foun no aumenta saladeaula ba eskola 14 no halo reabilitasaun ba eskola 12 ho kategória emerjénsia iha tinan ne’e.
Diretór Diresaun Rejionál Edukasaun no Solidariedade Sosiál Oekusi, Vincêncio Cono, informa, lista konstrusaun hirak-ne’e, edukasaun aprezenta ona ba iha Prezidente Autoridade RAEOA ho Diretór Jerál, nu’udar prioridade ba edukasaun atu ezekuta ho urjénsia iha tinan ne’e, tanba afeta husi dezastre naturál.
“Projetu hirak-ne’e, nesesáriamente no prioridade hodi tau atensaun ba edifísiu no konstrusaun sira iha territóriu RAEOA, knuuk ba Diresaun Edukasaun, hanesan solusaun alvu ba nesesidade bázika, ho razaun atu harii konstrusaun foun no reabilitasaun, ho tipu harii eskola foun tanba kauza dezastre naturál,” nia hateten ba Ajénsia Tatoli,I.P iha Oekusi, ohin.
Notísia relevante:Ameasadu husi erosaun, Autoridade transfere estudante 50 iha EBF Lamasin
Nia hateten, konstrusaun hirak-ne’ebé sei konstrui, antes ne’e ekipa téknika ona, presiza konstrui ho urjénsia, prioridade no nesesária, hodi responde preokupasaun komun no públiku, tanba eskola hirak-ne’ebé identifikadu, eziste tinan barak ona, seidauk halo reabilitasaun kompara ho númeru alunu kada tinan aumenta.
Notísia relevante:Edifísiu EBF Lamasin iha Nítibe hetan ameasadu husi erosaun
Entretantu, dokumentu ne’ebé Ajénsia Tatoli,I.P asesu iha Gabinete Diresaun Rejionál Edukasaun no Solidariedade Oekusi, kona-ba edifísiu ne’ebé presiza konstrusaun foun no aumenta saladeaula ba eskola 14 mak hanesan:
Eskola Bázika Sentrál (EBC, sigla portugés) paralela Nubani, EBC Teina’e no ESG Baqui perténsia iha suku Naimeko, EBC Tula-Ika Aenmat iha suku Lifau, sub-rejiaun Pante Makasar.
Edifisíu Diresaun Edukasaun tuan iha Santa-Roza suku Costa, Eskola Sekundária Gerál (ESG) Puinbeno iha suku Usitasa’e sub-rejiaun Oésilo, Eskola Bázika Filiál (EBF) Lamasin iha suku Bene-Ufe sub-rejiaun Nítibe.
EBF Palsa miha suku Malelat, EBF Aijaofucan no EBF Bimeni iha suku iha suku Abani sub-rejiaun Pássabe, EBF 01 de Maiu Palaban iha suku Costa sub-rejiaun Pante Makasar, EBF Nefomtasa iha suku Ban-Afi sub-rejiaun Nítibe, ESG Haobeno iha suku Lela-Ufe sub-rejiaun Nítibe.
Nune’e mós kona-ba dadus eskola ne’ebé presiza halo manutensaun ba eskola 12 mak hanesan: EBF Haemnanu iha suku Abani sub-rejiaun Pássabe, EBF Huabanais no EBF Nikinaheten iha suku Bobometo no EBF Buqui iha suku Usitasa’e sub-rejiaun Oésilo.
EBF Nefolete, EBC Haobeno no EBF Binino iha suku Lela-Ufe, EBF Besatoko iha suku Ban-Afi, sub-rejiaun Nítibe, EBF 1,2,3 Benosila Sonamnasi iha suku Cunha, EBF 1,2,3 Oélcaem iha suku Taiboko, EBF 1,2,3 Noapai iha suku Cunha no EBC Palaban iha suku Costa sub-rejiaun Pante Masakar.
Jornalista: Abílio Elo Nini
Editór: Rafael Ximenes de A. Belo
