OEKUSI, 07 Abríl 2026 (TATOLI) – Estudante sira iha Eskola Sekundáriu Tékniku Vokasionál Palaban iha Rejiaun Administrativa Espesiál Oekusi Ambeno (RAEOA), lamenta ho desizaun eskola, tanba kobra osan $10 kada estudante hodi selu profesór voluntáriu na’in-lima.
Lamentasaun ne’e, hato’o husi estudante EVT Palaban ho inisiál A.C, nu’udar portavós, hateten, antes ne’e, profesór sira orienta estudante sira hotu husi primeiru ano to terseiru ano, hatama osan dolar $10 kada estudante hodi selu manorin na’in-lima ne’ebé voluntária hela iha eskola referida no daudaun ne’e, estudante barak mak kontribui ona, no balun seidauk tanba la konkorda ho desizaun ne’e.
“Ami la satisfas tanba desizaun ne’e, konsidera kobransa ilegál, tanba iha eskola públika estudante labele kontribui osan ho montante boot hanesan ne’e hodi selu profesór voluntáriu sira, tanba Governu mak rekruta manorin-na’in atu hanorin estudante iha eskola ho gratuita,” nia hateten ba jornalista sira iha arredór ETV Palaban, ohin.
Hatan ba lamentasaun ne’e, Diretór Eskola Sekundáriu Tékniku Vokasionál Palaban, José António Oqui, rekoñese husi eskola halo kobransa ba estudante sira, no balun kontribui no balun seidauk kontribui tanba la konkorda ho desizaun ne’e.
Dirijente estabelesimentu ensinu ne’e, afirma, kona-ba desizaun ne’e, antes ne’e, parte eskola hala’o ona enkontru konkordánsia ho inan-aman, maibé sei hein despaixu husi Diresaun Rejionál Edukasaun no Solidariedade Sosiál, bainhira husi edukasaun la aseita ho desizaun ne’e, husi eskola sei devolve fali osan ba estudante sira.
“Antes ami hasai desizaun ne’e, ami hala’o enkontru uluk ho inan-aman sira, iha konkordánsia mak ami hasai avizu ba estudante sira atu kontribui osan kada estudante dolár $10, ne’ebé akta konkordánsia mós ami rai hela iha ne’e, maibé ami mós hato’o karta ida ba edukasaun, to’o agora seidauk hatun despaisu, karik la autoriza ami sei devolve fali osan sira-ne’e ba estudante sira, tanba osan sira-ne’e atu selu ba profesor voluntariu sira,” nia hateten.
Notísia relevante:Estudante ESG Filiál Ualili Baucau kontribui osan selu profesór voluntáriu
Entretantu, Diretór Diresaun Rejionál Edukasaun no Solidariedade Sosiál, Vincêncio Cono, konsidera kobransa ne’ebé akontese iha ETV Palaban, seidauk iha koñesimentu liuhusi karta ruma ba diresaun edukasaun.
Tanba ne’e, parte edukasaun sei koordena ho dirijente eskola sira atu retira desizaun kobransa osan ba estudante sira, tanba eskola públika labele kobra osan ba estudante sira hodi selu manorin voluntáriu sira.
“Ha’u mós hato’o obrigadu ba mídia sira, tanba informasaun ha’u foin rona, no durante ha’u seidauk hetan karta husi ETV Palaban, atu kobra osan. Ne’ebé, ha’u sei konfirma ba eskola, se bele retira ka kansela, tanba ne’e eskola públiku la’ós privada,” nia hateten.
Notísia relevante:Profesór voluntáriu 137 iha Dili tenke kompleta kursu ensinu superiór
Eskola Sekundáriu Tékniku Vokasionál Palaban, daudaun ne’e akumula hela estudante hamutuk 1005 ho totál profesór na’in-40.
Jornalista: Abílio Elo Nini
Editór: Rafael Ximenes de A. Belo
