DILI, 20 novembru 2023 (TATOLI) – Servisu Edukasaun Munisípiu Dili ezije profesór voluntáriu hamutuk na’in-137 atu partisipa iha kursu ensinu superiór ka mínima iha diploma baxarelatu, nune’e bele hanorin alunu sira.
Diretór Edukasaun Dili, Carlito da Silva, dehan rekizitu husi Ministériu Edukasaun sé de’it mak atu sai manorin tenke iha grau akadémiku baxarelatu ka lisensiatura, nune’e bele gia alunu sira iha ensinu aprendizajen.
“Profesór iha munisípiu Dili sei iha na’in-137 maka seidauk hetan diploma akadémiku, minimál baxarelatu. Ha’u husu ona ba sira atubele prepara aan hodi tuir ona formasaun akadémika, nune’e iha tempu ruma tama iha profesór kontratadu”, Carlito da Silva realsa iha Comoro, ohin.
Hanesan dirijente nia husu atu profesór 3.311 ne’ebé hanorin iha Dili, hahú husi nivel pré-eskolár to’o iha sekundáriu no tékniku vokasionál tenke iha hotu diploma. Signifika, dosente sira hotu presiza hetan formasaun akadémika iha universidade, mínimu ho grau baxarelatu, nune’e sira bele iha koñesimentu di’ak hodi sai profesór ne’ebé preparadu.
Nia salienta katak ida ne’e polítika ida ne’ebé tenke halo atu garante kualidade edukasaun ida di’ak liu ba futuru jerasaun foun sira hodi dezenvolve edukasaun iha Timor-Leste. Nonu Governu define ona katak molok tinan lima remata país tenke garante kualidade edukasaun, tanba ne’e maka daudaun parte hotu halo esforsu atu oinsá bele garante profesór sira ne’ebé mak hanorin dixiplina sira tenke iha diploma ensinu superiór.
“Maneira ida ne’e ha’u konsidera hanesan asaun ida ne’ebé ita halo atu aperta sira, tanba ita iha ona dadus sira na’in-137 voluntáriu ne’ebé seidauk iha diploma ne’e hakarak ka lakohi tenke kompleta sira nia grau akadémiku. Se la’e sira sei la tama iha kategoria no sira-nian profisaun nu’udar profesór bele sai ameasadu iha futuru”, afirma.
Daudaun, ekipa enumeradór sira ne’ebé hala’o hela sira-nian serbisu rekolla dadus manorin sira ne’e hanesan kritéru ida atu identifika kualidade profesór sira-nian. “Karik iha Dili profesór 137 ne’e maka lakohi prienxe rekizitu sira ne’e, futuru bele mosu desizaun ruma husi ministériu katak profesór sira ne’ebé laiha diploma tenke hapara, signifika laiha razaun atu defende aan. Tanba ne’e, liuhusi oportunidade sira ne’e, buka atu kumpre hodi bele sai manorin ida di’ak no manorin ida ne’ebé profisionál duni iha nia karreira rasik”.
Notísia relevante: Enumeradór 60 halo levantamentu dadus ba profesór sira iha territóriu
Tuir dadus, profesór ne’ebé hanorin iha Dili nhamutuk 3.311 – permante hamutuk 1.387, kontratadu 840, no voluntáriu 1.084.
Jornalista: Tomé Amado
Editora: Maria Auxiliadora
