KOVALIMA, 07 Abríl 2026 (TATOLI)- Servisu Rejistasaun no verifikasaun Emprezariál Institutu Públiku (SERVE.I.P) sukursál Kovalima, hahú Janeiru to’o Marsu iha 2026 ne’e arrekada ona reseita $3,289 ba kofre Estadu.
Koordenadór SERVE, I.P Sukursál Kovalima, Domingos Gavrila Amaral, dehan SERVE,I.P nia servisu mak halo atendementu ba públiku liuliu atende ba empreza sira atu hetan lisensa ba sira nia atividade negósiu.
“Ami halo atendimentu ba públiku hodi atende ba empreza sira halo rejistu hodi hetan lisensa ho legalidade. Ita nia rezultadu servisu durante trimestrál dahuluk ita konsege arrekada ona reseita $3,289 ba kofre Estadu”, Koordenadór SERVE, I.P Sukursál Kovalima ne’e, relata dadus ne’e ba jornalista iha Kampun Baru-Suai, ohin.
SERVE I.P kontribui reseita mai husi empreza sira halo rejistu ho nia kategóriu oioin mak hanesan novu rejistu 40, Enin 49 renovasaun husi enin 44, alterasaun husi enin 4 ho total enin hamutuk 97.
Rejistu kategória uni pesoál ne’ebé halo novu rejistu 15, renovasaun 51 alterasaun 14 ho totál hamutuk 80, kagoria Lda halo rejistu renovasaun 5, alterasaun rua, halo renovasaun ida. Reseita mai husi legaliza dokumentu no empreza sira hamoris dokumentu no seluk tan.
Ho nune’e Koodenadór ne’e informa durante halo atendimentu la hasoru difikuldade, maibé durante ne’e empreza sira balun sira-nia dokumentu invalidu la mai renova ne’e tanba razaun laiha informasaun no balun tanba laiha inspesaun husi institusaun relevante no balun to’o atu hetan projetu mak foin renova dokumentu.
Aleinde Kona-ba prosesu dokumentu hein uitoan tanba funsionáriu sira lori dokumentu ba iha nasionál ho nune’e SERVE rekomenda ona atu koloka konselór rejionál na’in-ida nune’e hodi bele garante atendementu efisiensia no efikasia ba públiku.
Jornalista: Celestina Teles
Editór:Florencio Miranda Ximenes
