VIKEKE, 09 Abríl 2026 (TATOLI) – Programa Merenda Eskolár (PME), implementa hosi governu, sai nu’udar merkadu ba agrikultór locál, afirma reprezentante Ministériu Agrikultura, Peska, Pekuária no Floresta (MAPPF), Lúcio Nunes.
Durante vizita ba postu administrativu Uatulari, Nunes explika katak PME utiliza produtu lokál 75% no produtu importadu 25% de’it.
Tuir dadus, eskola sira-ne’ebé sai benefísiáriu ba PME iha Munisipiu Vikeke kompostu husi Ensinu Báziku Sentrál (EBC-sigla portugeza) hamutuk 18, EBF hamutuk 77 no Ensinu Pré-Eskolár (EPE) hamutuk 32, ho totál estudante benefisiáriu hamutuk 20,487.
“Ida ne’e kria oportunidade signifikativa ida ba agrikultor sira hodi fornese ai-han ba eskola sira. PME sai nu’udar merkadu sólidu ida ne’ebé mak presiza planeamentu no esforsu hodi garante fornesimentu konsistentemente produtu lokál ho kualidade aas ba eskola sira,” dehan Nunes.
Reprezentante MAPPF ne’e destaka katak governu garante pagamentu ba agrikultor sira tanba ne’e nia husu to’os na’in sira atu fornese produtu ne’ebé nutritive.
“Agrikultor sira tenke hasa’e produsaun produtu lokál hodi reduz ita-nia dependénsia ba alimentu importadu. Tanba ne’e, ha’u enkoraja agrikultór Uatulari oan aumenta produsaun ba eskola sira”, nia akresenta.
Leanto Gomes, Diretor Segurança Alimentar Munisípiu Vikeke afirma katak maioria eskola sei nafatin uza produtu importadu, ho nune’e nia apela ba agrikultór lokál atu fornese ai-han ho kualidade aas ba estudande. “Ha’u mós husu ba autoridade lokál sira apoia implementsaun PME iha Uatulari,” nia dehan.
Programa Merenda Eskolár la’os de’it promove produtu lokál, maibe mós garante refeisaun nutritivas ba estudante, hametin ekonomia rurál no kontribui ba dezenvolvimentu sustentável nasau nian.
Notisia Relevante: Autoridade Vikeke no SME lansa programa merenda eskolár iha EBF Assalaitula
Jornalist: Vitorino Lopes da Costa
Editor: Filomeno Martins
