DILI, 10 Abríl 2026 (TATOLI)—Governu liuhusi ekipa Integradu ne’ebé kompostu husi Hospitál Nasionál Guido Valadares, Ministériu Saúde no Servisu Servisu Saúde Munisípiu Dili, ohin, taka ona ka desmantela funsionamentu ospitál temporaria iha Tasi-tolu, tanba durante semana ida-nia laran ne’e la rejista ona kazu dengue.
Notísia Relevante: Pasiente dengue na’in-ualu halo tratamentu iha ospitál temporáriu Kuarentena Tasi-Tolu
Diretor Servisu Apoiu Diagnóstiku Terapéutiku iha HNGV, Vidal de Jesus Lopes, hateten ospital temporária iha Tasi-Tolu ne’e hahú establese iha 31 Janeiru 2026, tanba espasu iha Hospitál Nasionál Guido Valadares overload hodi fó baixa pasiente ho moras kazu dengue.
“Husi Janeiru to’o mai agora kuaze loron 71, ita utiliza fiel ospitál Tasi-Tolu hodi fó baixa pasiente porvolta pasiente 510. Durante loron 71 laiha kazu ida mak mate,” Vidal de Jesus Lopes hateten ba Jornalista sira iha Tasi-Tolu, ohin.
Nia esplika, forsa traballu ne’ebé mak durante fó asisténsia ne’e hamutuk 105 ne’ebé kompostu husi infermeiru, médiku no tékniku aliadu inklui seguransa, cleaner no apoiu lojístika sira, tanba fatin ida-ne’e husi Ministériu Transporte no Komunikasaun nian, tanba Ministériu Saúde halo pedidu liuhusi APORTIL sira oferese fatin ne’e atu bele uza hodi fó baixa ba pasiente dengue sira.
Nia informa, kuaze semana ida ona pasiente dengue laiha ona tanba ekipa integradu Hospitál Nasionál Guido Valadares, Ministériu Saúde no Servisu Saúde Munisípiu Dili no tékniku sira deside ohin tenke desmentela tiha funsionamentu iha ne’e.
Antes ne’e, Diretór Jerál Servisu Kooperativu iha Ministériu Saúde, Narcisio Fernandes, hateten ministériu Saúde servisu hamutuk ho HNGV Dili, sei transfere pasiente dengue ba iha Kuarentena Tasi-Tolu.
“MS haree ba ospitál nasionál observa hela no diskusaun tékniku oinsá mobiliza rekursu liuliu médiku, enfermeiru, parteira no tékniku aliadu sira oinsá atu apoiu nune’e bele responde di’ak liután ba iha pasiente sira-ne’ebé sofre ba dengue,” nia dehan.
Opsaun ne’ebé mak atu ba Tasi-Tolu ne’e mós sai opsaun di’ak ida, tanba MS lakohi haree pasiente sira mai baixa fatin la to’o, balun tuur de’it iha korridór, balu, tuur de’it iha kadeira ho kama emerjensia ne’ebé la sufisiente.
Iha Sorumutu ne’e, parte rua halo mós diskusaun atu oinsá mobiliza ekipamentu, médiku, parteira, enfermeira no seluk tan hodi fó tratamentu ba pasiente ho kazu dengue.
Jornalista : Felicidade Ximenes
Editór : Cancio Ximenes
