DILI, 11 Abríl 2026 (TATOLI)—Ministériu Obra Públika liuhusi Unidade Inspesaun Verifikasaun ba Pagamentu (UIVP) orienta ona ekipa téknika no empreza sabrika Unip, Lda hodi hadi’a pavimentu ne’ebé a’at iha Kristu Rei.
Koordenadór UIVP-MOP, Aleixo Amaral do Carmo, hateten, pavimentu ne’ebé a’at ne’e tanba impaktu husi transporte ne’ebé para arbiru iha leten.
“Oinsá ema maka atu sama a’at nomós dalaruma kalan motorista sira laiha konsiénsia la’o kalan no hemu lanu kondús viatura la tuir nia dalan. Tamba trotoar ne’e ita implementa la’ós veíkulu mak atu utiliza maibé ne’e fasilita ba ema la’o ain sira, trotoar ne’e mós uza materiál masa entaun nia labele nakfera maibé naksobu de’it,” Koordenadór ne’e informa ba Ajénsia TATOLI, via telefónika, Sábadu ne’e.
Notísia relevante : PAM Dili presiza halo ezersísiu hafoin destaka pesoál iha estasionamentu Kristu Rei
Nia dehan, loloos ne’e ekipa seguransa iha atu tau-matan maibé tamba tempu kalan sira labele halo kontrolu ho di’ak, nune’e pasajeiru sira estraga infraetrutura iha sitíu turístiku.
“Tamba ne’e, husu ba motorista sira tenke iha konsiénsia bainhira kondús veíkulu, para iha fatin estasionamentu, labele para arbiru iha trotoar leten, atu labele estraga fasilidades ne’ebé Governu kria ona iha fatin públiku,” nia apela.
Empreza daudaun ne’e iha faze retensaun, uza materiál husi ne’ebé empreza Caltech prodús husi lixu sai ba tizolu (pavimentu modernu), entaun ba kontrusaun pavimentu iha Dili laran sei utiliza materiál referidu.
Jornalista : Alexandra da Costa
Editora : Julia Chatarina
