BAUKAU, 13 Abril 2026 (TATOLI) – Dirijente Ospitál Rejionál Eduardo Ximenes (HoREX, sigla portugés) klarifika kondisaun kama ne’ebé sai polémika iha rede sosiál, maske kama hirak-ne’e kondisaun di’ak no kontinua utiliza iha sala maternidade.
Diretór HoREX Baukau, Claudino Ximenes rejeita informasaun ne’ebé lansa iha rede sosiál relasiona ho kondisaun kama partu ne’ebé sei kontinua utiliza husi HoREX bainhira pasiente inan-isin-rua baixa hafoin partu iha-ne’ebé rekoñese kama rua mak kondisaun ferrujen tanba kama referida tempu Indonézia maibe kondisaun di’ak hela.
“Kama sira-ne’e ita halo sempre halo manutensaun hanesan pinta, maibé kama sira-ne’e kuandu fo’er kona (raan), ita atu hamoos pinta mós nia ferrujin nafatin,” Diretor Ezekutivu HoREX Claudino Ximenes hateten iha Vila nova, Segunda ne’e.
Claudino Ximenes lamenta ho atetude vizitante ne’ebé espalla informasaun, laiha autorizasaun no la halo konfirmasaun ba parte HoREX kona-ba kondisaun kama ne’ebé utiliza iha sala maternidade hafoin vizita família iha Sábadu, 04 marsu 2026 hodi hamosu reasaun husi autoridade kompetente no husik hela polémika iha públiku.
Nia subliña, HoREX Baukau iha tinan-2025 hetan apoia kama husi Governu liuhusi Ministériu Saúde (MS) no atúal sufisiente ba pasiente sira-ne’ebé halo tratamentu baixa iha ospitál referida no tinan-ne’e sei iha tán apoia kama haat.
“Kuandu kondisaun ladi’ak ami evakua sai ona, maibé atu dehan katak kama sira-ne’e kondisaun di’ak no seidauk fó impaktu ba pasiente sira inklui kontinua utiliza ba inan ne’ebé partu iha sala maternidade,” Claudino Ximenes akresenta.
Entretantu, HoREX Baukau iha sala maternidade hamutuk kuartu rua kompostu kuartu númeru I kama tolu no kuartu númeru II kama tolu no tuir planu sei aumenta kama bainhira apoia husi nasionál liuhosi MS.
Jornalista: Natalino Belo
Editór: Evaristo Soares Martins
