BOBONARU,14 Abríl 2026 (TATOLI)— Sura de’it loron governu liu husi Primeiru Ministru, Kayrala Xanana Gusmão, ofisialmente sei halo inaugurasaun ba projetu reabilitasaun estrada urbana Maliana villa pakote I no II ne’ebé empreza internasionál Hutama Karya no Bina Mitra mak entrega.
Loron inagurasaun ne’e sei akontese iha Sesta 18 fulan abril 2026, maibé molok atu to’o iha data planeadu, komunidade sira hakarak fó hanoin ba governu atu labele haluha tau mós orsamentu hodi konstrui sistema drenajen no trotar iha estrada trosu ba bairu sira hanesan Ospitál-tuan, Holsa no seluk tan. Tanba drenajen iha área hirak ne’e la inklui iha dezeñu no BoQ ba implementasaun projetu reabilitasaun estrada Maliana pakote I no dadaun ne’e du’ut ho foer mak nakonu.
Komunidade Maliana, Delfim Amarál, orgulu no apresia ho esforsu ne’ebé governu halo hodi hadi’a ligasaun asesu estrada área urbana ho rural. Maibé nia destaka mós importansia husi drenajen tanba funsiona atu kanaliza bee superfísie (udan-been) hosi superfísie estrada nian ba fatin soe finál nian ho objetivu atu mantein estrada maran, prevene sira ne’ebé estraga estrutura pavimentu nian, prevene erozaun, no garante seguransa ba utilizadór sira estrada nian.
Notísia Relevante:Reabilitasaun estrada Maliana hatudu progresu, “Ida-ne’e mak ami povu nia hakarak”
“Ita bele hare dalan sira tama ba bairu ne’e balu bee dalan iha, mais barak liu mak laiha, ezemplu husi Rotunda Maliana sa’e Ospitál tuan ne’e, kuaze bee dalan laiha, husik los de’it, bee la’o arbiru de’it, ne’e la halo udan mai bele sobu fali estrada ida governu halo ona ne’e. Tanba ami husu governu atu halo mós bee dalan tanba estrada ne’e atu furak tenke iha mós bee dalan. Rua ne’e pakote ida, la’e ita ema ida karik, hata’is ropa mais, sepatu laiha, hare la furak ida, ” Delfim informa ba Tatoli, iha Maliana, Tersa ne’e.
Sorin seluk, Motorista transporte públiku, Vidal Afonso, dehan estrada di’ak no kaber ona, maibé área barak mak vuneravél no risku tebes atu fó impaktu ba alkatraun.
“Agora sei uza bee dalan tuan, foin lalais udan ne’e bee nakonu halai tama fali mai estrada laran, tanba fatuk ho rai nakonu iha valeta laran. Se ida ne’e mak tinan ida ne’e ou tinan oin ita la halo valeta, ne’e estrada ne’e la dura, la kleur bele sobu, nakfera hotu, tanba ne’e ami husu governu tau planu oinsa para halo mós valeta para estrada ne’e ita hare kompletu no kaber los,” nia dehan.
Alende ne’e, Komunidade Saturina Lopes, apresia tanba estrada atuál bele fasilita movimentasaun públika, hadi’a asesu ba merkadu, servisu públika no aktividade seluk tan, maibé governu presiza konstrui mós Trotoar hodi fasilita ema la’o ain asesu ba mai ho di’ak no seguru.
Notísia Relevante:MOP observa progresu reabilitasaun estrada Maliana vila
“Estrada iha jalur bo’ot ne’e ita hare, ema la’o fatin iha kapas no luan los, maibé tama ba bairu ne’e mak laiha fali. Ida ne’e ema la’o ain sira tauk tanba dalan klo’ot, kareta ho motor ou kareta ho kareta hasoru malu bele soke sala ita, fasíl tebes atu akontese asidente. Entaun ami husu governu hanoin to’ok ba, para ita bele prevene tia buat sira ne’e labele akontese, tanba estrada ba transporte no trotoar ba ita ema la’o ain,” nia dehan.
Enkuantu Antes ne’e Koordenadór Infraestrura destakadu Ministériu Obras Públika, Fernando de Fatima, relata ekipa tekniku relata ona dezeñu drenajen ba Ministeriu Obras Públika atu tau orsamentu hodi kompleta iha tinan oin.
Enkuantu Obra ne’e pakote rua ne’e, empreza Hutama Karya ezekuta ho valór orsamentu millaun $21 resin no Bina Mitra millaun $12 resin.
Jornalista : Sergio da Cruz
Editora : Armandina Moniz
