DILI, 15 Abríl 2026 (TATOLI)—Polísia Nasionál Timor-Leste (PNTL) liuhusi Diresaun Nasionál Servisu Investigasaun Kriminál (DNSIK) deteta armazein ida iha área Bidau, Aldeia Sagrada Família, Suku Bidau Santa -Ana, Postu Administrativu Kristu Rei, rai osan ho montante boot.
Nune’e, iha Kuarta (15/04) tuku 10:30 dadeer, ekipa responsável halo kedas planu operasaun ba fatin ne’e.
Operasaun ne’e lidera husi Diretór Nasionál Servisu Investigasaun Kriminál, Superintendente Xefe Polísia, João Belo dos Reis, ne’ebé tuun kedan ba lokál no deteta duni katak armazein ne’e rai osan tahan no moeda ho kuantidade boot.
Notísia relevante : PCIC buka tuir autór prodús moeda sentavus 200 falsu
Durante operasaun, ekipa konsege deskobre osan tahan maioria ho valór $100 rai metin iha brankas, iha armazein laran inklui osan moeda balun ne’ebé suspeitadu falsu.
Ho nune’e, Autoridade Seguransa halo kedas apreensaun ba objetivu sira ne’e no daudaun lori ona ba Dl iha Komandu PNTL – Kaikoli hodi kontinua halo identifikasaun. Entretantu, Polísia sei buka tuir rede husi kazu ne’e.
“Diresaun Nasionál Servisu Investigasaun Kriminál rejista ona kazu ne’e ho NUC: 0138/26.PNSIC,” sita husi karta ne’ebé Ajénsia TATOLI asesu, Kuarta ne’e.
Daudaun Polísia asegura na’in ba armazein referida, ne’ebé nu’udar xineza, hodi halo identifikasaun.
Jornalista : Natalino Costa
Editora : Julia Chatarina
