BAUKAU, 19 Abríl 2026 (TATOLI) – Komunidade husi área Badunau, aldeia Luliheni, suku Bukoli, postu administrativu Baukau vila husu Governu apoia infraestrutura bázika hanesan reabilita estrada no instala eletrisidade.
Komunidade Agostinho Belo ‘ Maululik’, esplika razaun komunidade husu apoia tanba área referida durante okupasaun Portugés no Indonézia to’o ukun-aan hasoru difikuldade infraestrutura bázika liuliu estrada, eletrisidade no bee-moos.
“Estrada no eletrisidade to’o agora susar tebes ba ami, durante tinan-24 ukun-aan ami seidauk sente tanba falta infraestrutura bázika,” Agostinho Belo ‘Maululik’ hateten iha Badunau, Sábadu ne’e.
Nia relata, kondisaun estrada ne’ebé atuál komunidade asesu difikulta movimentasaun transporte iha-ne’ebé antes ne’e liuhusi proposta husi suku hetan apoia husi IGEADI enkuantu eletrisidade to’o atuál Governu seidauk responde mezmu komunidade hato’o ona proposta.
Alende ne’e, bee-moos ho inisiativa hamutuk ho komunidade tomak konsege kanaliza maibe atuál hetan estragu iha bee-matan no kanu nune’e difikulta komunidade asesu ba bee-moos.
“Ami husu atu Governu fó atensaun ba situasaun ida-ne’e,” Maululik akresenta.
Entretantu, komunidade iha área Badunau hamutuk totál uma-kain 21 kompostu uma-lisan tolu hanesan Nelale Busa, Sineleki no Rubikai iha-ne’ebé distánsia hamutuk kilometru 8,5 hanesan husi Bucoli hamutuk kilometru 2,6 no husi Badunau ba Kaisidu ho distánsia kilometru 4,9.
Jornalista: Natalino Belo
Editór: Rafael Ximenes de A. Belo
