DILI, 20 Abríl 2026 (TATOLI) –Komandante Jerál Polísia Nasionál Timor-Leste (PNTL), Komisáriu Assistente Polísia Afonso dos Santos no Segundu Komandante Jerál Komisária Asistente Natercia Soares Martins, iha segunda ne’e fó posse ba ofisiál superiór hamutuk na’in-13 hodi lidera komandu munisípiu, unidade no kargu xefia iha postu komandu PNTL nian.
Ofisiál Superiór ne’ebé hetan fiar mak hanesan; Komisariu Assistente Agostinho Gomes hodi lidera hikas Komandu Unidade Espesiáll Polísia (UEP) no ofisiál Superiór PNTL nai’in-12 mós hetan fiar husi Komandu hodi assume kargu hanesan komandante munisipiu, unidade no diresaun justisa PNTL nian.
Superintendente Xefe Polísia Joni Viana das Regras asume kargu nu’udar Komandante Komandu PNTL Munisipiu Manatutu, Superintendente Xefe Polísia Euclides Belo simu pose nu’udar Komandante PNTL Munisípiu Vikeke, Superintendente Xefe Polísia António Rego Fernandes nu’udar Komandante PNTL Munisipiu Lauteim.
Komandu PNTL Munisípiu Ainaru asume husi Superintendente Xefe Polísia Emilio dos Santos no Superintendente Xefe Polísia Damião Correia lidera PNTL Munisipiu Bobonaru.
Komandu Unidade Patrullamentu Fronteira (UPF) lidera husi Superintendente Xefe Polísia Calisto Gonzaga no Komandu PNTL Rejiaun Administrativa Espesial Oekusi Ambeno (RAEOA) lidera husi Superintendente Xefe Polísia Nicolau F. da Costa.
Entretantu, Komandu PNTL Munisipiu Baucau asume husi Superintendente Xefe Polísia João Sancho Pires no Diresaun Justisa no Disiplina PNTL lidera husi Sueperintendente Xefe Polísia Moisés Amaral.
Superintendente Xefe Polisia Inácio Saldanha asume kargu nu’udar Xefe Departamentu Seguransa Komandu Jerál nian no Superintendente Polísia Basilio de Jesus asume knaar hanesan Komandante Sentru Formasaun Polísia (CFP, sigla portugés). Ikus liu Segundu Komandante PNTL Munisipiu Dili asume husi Superintendente Polísia Luís da Silva.
Komandante Jerál PNTL, Komisariu Asistente Polísia Afonso dos Santos, husu atu koopera Ho autoridade munisipál, igereja no veteranu sira iha idaidak nia munisipiu.
“Importante maka sai komandante ne’ebe maka iha ligasaun di’ak ho povu, husi autoridade lokál no aldeia sira inklui kontrola efetivu membru sira ne’ebe iha kada komandu Munisipiu,” nia fó hanoin ne’e iha Kuartél Jerál PNTL, Kaikoli, segunda ne’e.
Jornalista: Natalino Costa
Editór: Evaristo Soares Martins
